Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Matbuot Выпуск №16 от 24.08.2017 QUTLUG‘ YO‘LDA YO‘LBOSHCHINGGA YELKADOSH BO‘L

QUTLUG‘ YO‘LDA YO‘LBOSHCHINGGA YELKADOSH BO‘L

Yoshlik – umrning eng latif fasli. Unda zo‘r qudrat etiladi. Davlatimiz rahbari Shavkat Mirziyoev joriy yil 30 iyun kuni mamlakatimiz yoshlari bilan uchrashuvda bu jihatlarga to‘xtalib, jismoniy va ma’naviy etuk yoshlar – ezgu maqsadlarimizga etishda tayanchimiz va suyanchimiz ekanini alohida qayd etdi. «1-Gidrometallurgiya zavodi» kon boshqarmasining ilg‘or yosh ishchi-xodimlari Prezidentning yoshlarga bo‘lgan katta ishonchidan mamnun ekanliklarini, davr shiddati bugun ulardan fidoyilikni, yangicha ruhda mehnat qilishni, ogoh va hamisha sergak bo‘lishni talab qilayotganligini ta’kidladilar.

Ashurali XOLBO‘TAEV, 

energiya uchastkasining elektr qurilmalariga  xizmat ko‘rsatish va ta’mirlash bo‘yicha elektromontyori, ma’lumoti o‘rta-maxsus, 24 yoshda.

Hayotdagi shiori: «Orzuga etish qanchalik murakkab bo‘lmasin, yo‘ldan qaytmaslik va hayotda qanday maqomga etishsa ham odamiylikni yo‘qotmaslik».

 – Kon boshqarmadagi barcha energiya xizmatlari men mehnat qilayotgan uchastka tomonidan amalga oshiriladi. SHaxsan menga 1000 voltgacha bo‘lgan elektr uskunalarini ta’mirlash va xizmat ko‘rsatish vazifasi yuklatilgan. Zimmamdagi topshiriqlarni o‘z vaqtida va o‘z o‘rnida bajarishga harakat qilaman.

Men kitobxon oilada o‘sib ulg‘ayganman. Aniq dalillarga asoslangan mazmunan boy, tarixiy asarlarni sevib o‘qiyman.  Ozarbayjon tarixchisi YUnus O‘g‘uzning ikki jildlik «Amir Temur» tarixiy romani, Said Ahmadning «Ufq» trilogiyasi, Salohiddin Toshkandiyning «Temurnoma», Nabijon Boqiyning Abdulla Qodiriy haqidagi «Qatlnoma» asari va Mirzo Ulug‘bek haqidagi «Ulug‘bek» essesi, O‘rol Nosirovning «O‘zbeklar shajarasi» kitoblarini  zo‘r qiziqish bilan o‘qib chiqqanman. Bunday asarlar insonni oliy va ezgu maqsadlarga ildam qadam tashlashga rag‘batlantiradi.

Men ulug‘ ajdodlar ruhi poki kezib yurgan aziz makonda yashayotganimdan, respublikadagi eng nufuzli korxonada mehnat qilayotganimdan faxrlanaman. Prezidentimizning millatning yorug‘ kelajagi yo‘lida katta talabchanlik bilan olib borayotgan oqilona siyosatidan to‘lqinlanib ketaman va qalbimda Vatan taqdiriga daxldorlik tuyg‘ulari jo‘sh uradi. SHiddat bilan rivojlanayotgan ona O‘zbekistonimiz yaqin yillarda dunyodagi eng rivojlangan davlatlar qatoridan joy oladi va bunda mening ham kichik bir ulushim bo‘ladi.

Jahongir ZAYNUTDINOV, 

Energiya uchastkasining elektr qurilmalariga  xizmat ko‘rsatish va ta’mirlash bo‘yicha elektromontyori, ma’lumoti o‘rta-maxsus, 25 yoshda.

Hayotiy shiori: «Bir joyda to‘xtab qolmaslik va har doim oldinga qarab intilish».

– Yoshlarning ilm-fandagi izlanishlari samarasini, sport va madaniyat sohasidagi yutuqlarini, ma’naviy va jismoniy yuksalishini mustaqillik sharofati, deb bilaman. O‘n uch yildan buyon sportning basketbol turi bilan shug‘ullanaman. Basketbol bo‘yicha kombinat terma jamoasi kapitaniman. Sportda erishgan yutuqlarim e’tirof etilib, 2015 yilda «Kamolot uyi» loyihasi bo‘yicha oilamiz yangi xonadonga ega bo‘ldi.

Bugungi kunda o‘z sevgan kasbimda faoliyat yuritmoqdaman. Har bir sohaning o‘ziga xos nozik jihatlari va sirlari bor. O‘z kasbimning ustasi bo‘lish uchun tinmay izlanaman, sohaga oid texnik adabiyotlarni o‘qib boraman. Kitob o‘qimasdan turib, texnologiya va elektr jihozlaridan foydalanish yuzasidan nazariy bilimlarga ega bo‘lish mumkin emas.

O‘zbekistonda kechayotgan islohotlar nafaqat xalqimizda, balki xorijlik­larda ham katta qiziqish uyg‘otmoqda. 2017-2021 yillarda O‘zbekiston Respublikasini yanada rivojlantirishning beshta ustuvor yo‘nalishi bo‘yicha Harakatlar strategiyasida ham demokratik davlat qurish va fuqarolik jamiyatini rivojlantirish borasidagi islohotlarda yoshlar faolligini oshirish bilan bog‘liq muhim vazifalar belgilab berilgan. Biz yoshlar yurt ravnaqi yo‘lida bor bilim va iqtidorimizni ishga solib mehnat qilamiz. Kelajakdagi orzum – yurtga nafi tegadigan munosib farzandlar tarbiyalash.

Adolat XUDAYKULOVA, 

2-texnologik sexning texnologik jihozlarni ta’mirlash uchastkasi asboblar ombori omborchisi, ma’lumoti o‘rta-maxsus, 26 yoshda.

Hayotdagi shiori: «Aniq maqsad sari shijoat bilan harakatlanish».

Menga ko‘p tengdosh qizlar havas qilishadi. Negaki, men Navoiy kon-metallurgiya kombinatidek nufuzli korxonada mehnat qilaman. Sevimli kasbim va ahil jamoam borligidan xursandman. Bizning bo‘linma ishlab chiqarishning bosh bo‘g‘ini hisoblanadi va bu erda tayyor mahsulot olishning 1- va 2-bosqichlari amalga oshiriladi.

Prezidentimizning joriy yil 5 iyuldagi «Yoshlarga oid davlat siyosati samaradorligini oshirish va O‘zbekiston yoshlar ittifoqi faoliyatini qo‘llab-quvvatlash to‘g‘risida»gi farmoni mamlakatimiz yoshlari hayotida tub burilish yasadi. Yangi tashkil qilingan tashkilot yoshlarning tom ma’nodagi suyanchiga aylanmoqda. Endilikda bu tuzilma yoshlarning huquqlarini ta’minlash, Vatanga muhabbat, kelajakka ishonch hissini qaror toptirish, puxta bilim egallashlari, malakali mutaxassis bo‘lib etishishlari uchun zarur sharoitlar yaratish, ma’naviyatini yuksaltirish, sog‘lom turmush tarzini shakllantirish, uyushmagan yoshlar qatlami bilan ishlash, moddiy va ma’naviy qo‘llab-quvvatlash, yoshlar siyosati borasida xalqaro hamkorlikni kengaytirish kabi qator vazifalarni hal etadi.

Kelajakdagi niyatim ko‘proq kitoblar mutolaa qilib kamolotga erishish va bir oilaning chin ma’nodagi malikasi bo‘lib, jamiyatga sog‘lom farzandlar tarbiyalab berish.

Sardor RAHMONOV,

texnologik sex apparatchi-gidrometallurgi, ma’lumoti o‘rta-maxsus, 20 yoshda.

Hayotdagi shiori: «Hayotga kelgan har bir inson katta kuchga ega. Hamma gap o‘sha kuchni uyg‘ota olishda».

– Men kombinatning asosiy ishlab chiqarish bo‘g‘inida mehnat qilayotganimdan faxrlanaman. Bizning seximiz har xil kon ma’danlaridan tayyor mahsulot olish texnologiyasini aniqlaydi. Mening vazifam texnologik jarayonlarni olib borishdan iborat. Ishimiz qiziqarli, har kuni bir xil jarayon takrorlanmaydi. Bu erda ratsionalizatorlik ishlarini olib borish uchun barcha sharoitlar etarli. Jamoamizda ustoz-shogirdlik an’analari yaxshi yo‘lga qo‘yilgan. Ustozlarimiz texnologik jarayonlarda tejamkorlikka rioya qilish, yangi loyihalar ustida ishlash bo‘yicha takliflar berishadi. Bir necha yillardan beri shahar chiqindilaridan biogaz olish bo‘yicha «Ekogaz» loyihasi ustida ish olib borayapman. Agar ushbu loyiham hayotga tatbiq etilsa, yaxshi iqtisodiy samaradorlikka  erishish mumkin.

Serquyosh diyorimiz kundan-kunga chiroy ochib borayotganidan, mamlakatimiz rivojlangan davlatlar qatoridan o‘rin olayotganidan faxrlanaman. Har doim qalbimda mana shunday aziz yurtga munosib farzand bo‘lish ishtiyoqi yonib turadi. YUrtimizda yoshlar uchun katta imkoniyatlar eshigi ochildi. Men O‘zbekistonni yosh olimlar, yosh tadbirkorlar, yosh rahbarlar, bir so‘z bilan aytganda, yoshlar mamlakati, degim keladi. YOshi ulug‘lar tajribasi bilan yoshlar g‘ayrat-shijoati uyg‘unlashgan joyda jahonshumul yangiliklar sodir bo‘lishiga ishonaman. Barcha  tengdoshlarimni O‘zbekistonning yorug‘ kelajagi yo‘lida bir jon, bir tan bo‘lib mehnat qilishga chaqiraman.

Ha, bu yosh yigit-qizlarning yonib turgan yuz-ko‘zlari, dadil va o‘ktam gap-so‘zlari hayratimizni oshirdi. Davlatimizning yoshlarga oid siyosati bugun o‘z samarasini berayotganidan quvondik. SHoirning ushbu da’vatkor satrlari esa xuddi bizning yoshlarimizga qarata aytilganday:

 

Ko‘zdan olov, qadamingdan shiddat yog‘dir,

Yot dillarda o‘z qavmingga izzat yog‘dir,

Boqqan ota-onangga ming rahmat yog‘dir,

Mard xalqingga munosib mard o‘lkadosh bo‘l,

Qutlug‘ yo‘lda Yo‘lboshchingga elkadosh bo‘l.

 

Salima XOLDOROVA 

suhbatlashdi.

 

Ta'sis etuvchi - NKMK mehnat jamoasi

Gazeta materiallarini to’la yoki qisman qaytadan bosish tahririyatning yozma ruxsati bilan amalga oshiriladi. Tahririyatga kelgan qo’l yozmalar taqriz qilinmaydi va muallifga qaytarilmaydi. Gazeta NKMK bo’linmalari orasida tarqatiladi. 

Gazeta Navoiy viloyat matbuot va axborot boshqarmasida 2006 yil 21 dekabrda 07-025 raqam bilan ro’yxatga olingan.
MUHARRIR

Zaripov Azamat Gulomovich 

- matbuot markazi boshlig’i.
TAHRIRIYAT MANZILI : 210100, Navoiy shahri, Navoiy ko’chasi 27, NKMK boshqarmasi. 
TELEFONLAR: : 77-464 (muharrir), 77-363 (texn. muharrir), 77-366, 77-464 (matbuot markazi), 77-566 (faks).

Biz bilan bog'lanish

  • Umumiy bo‘limi (devonxona): +(998 79) 2277164
  • Ishonch telefoni: +(998 79) 2277222

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Matbuot Выпуск №16 от 24.08.2017 QUTLUG‘ YO‘LDA YO‘LBOSHCHINGGA YELKADOSH BO‘L