Shu kunlarda butun mamlakatimiz xalqi qatorida ahil jamoamiz yaxshi niyatlar bilan Yangi – 2024-yilga qizg‘in hozirlik ko‘rmoqda. Bayram taraddudi barchaga olam-olam quvonch baxsh etib, faoliyatni sarhisob qilishga, yangi rejalarni belgilashga undayapti. Barcha bo‘linmalarimizda bu go‘zal ayyom keng nishonlanmoqda.

Yakunlanayotgan yilda Yangi O‘zbekistonning buguni va ertangi kuniga daxldor unutilmas voqealarga guvoh bo‘ldik. Davlatimiz Rahbari boshchiligida siyosiy, ijtimoiy-iqtisodiy, ma’naviy-ma’rifiy hayotning barcha jabhalarida, har bir sohada keng qamrovli islohotlar, yaratuvchanlik ishlari amalga oshirildiki, bu – Vatanimizning xalqaro hamjamiyatdagi o‘rni, yurtimiz taraqqiyoti, xalqimiz farovonligini oshirishga mustahkam zamin yaratdi. Boshlangan xayrli va bunyodkorlik ishlari ayni paytda ham barqaror sur’atlarda davom etmoqda.

Joriy yil ko‘pming kishilik jamoamiz uchun quvonchlarga boy bo‘ldi. Bu davrda o‘zimizga bildirilgan yuksak ishonchni mehnatimiz bilan yana bir karra oqlab, ulkan marralarni zabt etishga erishdik. Muhim investitsion loyihalarni amalga oshirib, rejalarni ortig‘i bilan bajarishga muvaffaq bo‘ldik. Buning barchasi muhtaram Yurtboshimizning qo‘llab-quvvatlashi, fidokorona mehnat, aniq maqsadlar yo‘lida olib borgan ishlarimiz, hamjihatligimiz tufaylidir. Bozor iqtisodiyoti, raqobat sharoiti va dunyo tajribasi ertasini o‘ylagan har bir soha, korxona uchun zamon ruhiga mos ravishda rivojlanish yo‘lini tanlashni taqozo etmoqda.

Bugun oldimizga katta maqsadlarni qo‘yganmiz. Niyatimiz zamonaviy texnologiyalar va innovatsion ishlanmalarni joriy etish orqali jahonda o‘z o‘rnimizni saqlab qolish emas, balki undan ham katta marralarni egallashdir. Buning yaqqol misoli sifatida aytadigan bo‘lsak, yangi ishlab chiqarish quvvatlarini foydalanishga topshirilishi natijasida NKMK jahonning oltin ishlab chiqaruvchi yirik kompaniyalari o‘rtasida 2016-yildagi 7-o‘rindan 2023-yilda 4-o‘ringa ko‘tarildi va bu, biz uchun eng katta e’tirof ekanini aytib o‘tish o‘rinlidir.

Kanadaning “Kitko” xalqaro tahlil markazi e’lon qilgan 2022-yilda dunyodagi TOP-10 ta konlar ro‘yxatida “Muruntov” koni oltin qazib olish bo‘yicha jahonda yetakchi konlardan biri sifatida tan olingani muvaffaqiyatlarimiz davomidir, albatta. London oltin quymalari bozori assotsiatsiyasi (LBMA – London Bullion Market Association)ning kombinat bozor talablariga to‘la rioya qilish borasida navbatdagi test sinovlaridan muvaffaqiyatli o‘tganligini tasdiqlovchi sertifikatini qo‘lga kiritdik. Shuningdek, yakunlanayotgan yilda ochiqlik indeksi, raqamlashtirish bo‘yicha respublikada birinchilardan bo‘ldik.

Shuni mamnuniyat bilan ta’kidlash joizki, bugun kombinat yuqori ishlab chiqarish ko‘rsatkichlari, har qanday murakkabliklarga yechim topib, har qanday vazifani amalga oshirishga qodir kadrlar va ilmiy potensialga ega korxonadir va bu imkoniyatlar ortidan bu yil ham quvonchli natijalarni qayd etdi. Nurota tumani hududida barpo etilgan 6-gidrometallurgiya zavodi va “Pistali” koni bu yilgi eng yirik investitsion loyiha hisoblanadi. Minglab ish o‘rniga zamin yaratgan mazkur obyektlar ayni paytda to‘liq quvvatda ishlamoqda. Shuningdek, Navoiy mashinasozlik zavodida 25 tonnalik zamonaviy metall eritish pechi, 2-gidrometallurgiya zavodida raqamlashtirilgan yagona boshqaruv markazi, “Muruntov” ohaktosh konida maydalash-saralash majmuasi va boshqa obyektlar, shuningdek, Tomdi tumanida 504 o‘rinli ixtisoslashtirilgan maktab-internati va “To‘dako‘l” dam olish bazasida Xalqaro shaxmat maktabini zamonaviy uslubda barpo etganimiz bunyodkorligimizning yorqin ifodasidir.

2023-yilning prognoz natijalariga ko‘ra, NKMK tomonidan joriy yilda mahsulot ishlab chiqarish 67,2 trillion so‘mni tashkil etib, reja 103,8 foizga bajarilishi, 474 million dollarlik investitsiya mablag‘lari o‘zlashtirilishi, 625 milliard so‘mlik mahalliylashtirilgan mahsulot ishlab chiqarilib, rejani 112,8 foizga bajarish mo‘ljallanayotgani jamoamiz uchun ulkan natijadir. Bu raqam va yutuqlar zamirida, albatta, mas’uliyatni chuqur his etib, kecha-yu kunduz olib borilgan ishlar mahsuli mujassam. Ushbu marralarni zabt etishga qo‘shgan munosib hissangiz uchun har biringizga o‘zimning samimiy tashakkurimni bildiraman. Ishonamanki, Yangi yilda ham bunday yutuqlar yanada ko‘payadi.

Kombinat solnomasidagi yana bir unutilmas voqea – korxonamiz tashkil topganligining 65 yilligi, jamoa mehnatining yuksak e’tirofi, keng miqyosda nishonlangani bo‘ldi. Ayniqsa, sana munosabati bilan Prezidentimizning jamoamizga yo‘llagan tabrigi, bir guruh hamkasblarimiz davlatimizning yuksak mukofotlari bilan taqdirlangani korxonamiz har bir a’zosiga cheksiz surur va g‘urur bag‘ishladi.

Hamkasblarimizning mamlakatimiz ravnaqi yo‘lidagi fidokorona mehnatlari hamisha Prezidentimiz va hukumatimiz tomonidan yuksak darajada e’tirof etib kelinmoqda. Joriy yilda Xotin-qizlar kuni, Mustaqillik bayrami, kombinat tashkil topganligining 65 yilligi munosabati bilan hamkasblarimizdan 2 nafari “O‘zbekiston Respublikasida xizmat ko‘rsatgan sanoat xodimi” faxriy unvoni, 9 nafari “Do‘stlik” ordeni, 1 nafari “Mehnat shuhrati” ordeni va 11 nafari “Shuhrat” medali bilan taqdirlangani buning isbotidir.

Albatta, har bir ish, qo‘yilayotgan qadamlar yaxshi niyatdan boshlanadi. Shu maqsadda, kelgusi yilda juda katta ishlarni amalga oshirishni maqsad qilganmiz. Oldinda bizni bundanda yuksakroq vazifalar kutib turibdi. Boshlagan ishlarimizni, qolaversa, yangi rejalarimizni izchil davom ettirish, davlatimiz oldida yuzimiz yorug‘ bo‘lishi uchun hamjihatlikda ishlashimiz zarur. Muhimi, bizning navbatdagi maqsad va rejalarimiz aniq.

Yaqinda O‘zbekiston Respublikasi Prezidentining “O‘zbekiston-2030” strategiyasi to‘g‘risida”- gi Farmoni va “O‘zbekiston-2030” strategiyasini 2023-yilda sifatli va o‘z vaqtida amalga oshirish chora-tadbirlari to‘g‘risida”gi qarori qabul qilindi. Unga muvofiq, Navoiy kon-metallurgiya kombinatida yaqin yillarda yirik investitsion loyihalarni amalga oshirishni mo‘ljallayapmiz.

“Kokpatas” va “Dovgiztov” oltin konlarida ma’dan qazib olishning 3-bosqichi”, Navbahor tumanida “Sarmish” koni zaxirasini ochish va qayta ishlash”, “Nuqrakon” va “Kosmonachi” konlaridan kumush tarkibli ma’danlarni qazib olish va qayta ishlash majmuasini qurish”, “Yangi Dovon-Toshkon” konida ma’danlarni qazib olishni kengaytirish”, “Muruntov” konini o‘zlashtirishning V navbat 2-bosqichi” kabi investitsion loyihalar shular sirasiga kiradi. Bu ishlarni ro‘yobga chiqarish kelgusida qimmatbaho metallar ishlab chiqarish hajmini ko‘paytirish va minglab yangi ish o‘rinlari ochish imkonini beradi.

“Insonga e’tibor va sifatli ta’lim yili”da ishchi-xodimlarimizni ijtimoiy himoya qilish, ularning oilasi va farzandlari, mehnat faxriylarimizni farovon yashashi uchun ham juda katta, e’tirofga molik xayrli ishlar amalga oshirildi.

Fursatdan foydalanib, yana bir bor sizlarni kirib kelayotgan Yangi – 2024-yil bilan chin qalbdan samimiy tabriklayman.

Sizlarga mustahkam sog‘lik-salomatlik, oilaviy baxtu saodat, jonajon Vatanimiz ravnaqi yo‘lidagi ishlaringizda ulkan zafarlar tilayman.

Ilohim, qutlug‘ qadam bilan kirib kelayotgan Yangi yil jannatmakon yurtimizga tinchlik-xotirjamlik, to‘kin-sochinlik, farovonlik olib kelsin!

Quvondiq SANAQULOV,

Navoiy kon-metallurgiya kombinati Bosh direktori.