• Создано: 22.05.2024
• Обновлено: 22.05.2024
• Прочитано: 1162

Shimoliy kon boshqarmasi – kombinatning yirik bo‘linmalaridan biri

Shimoliy kon boshqarmasi “Navoiy kon-metallurgiya kombinati” AJning yirik bo‘linmalaridan biri bo‘lib, bu yerda ishlab chiqarilayotgan qimmatbaho metallar mamlakatimiz iqtisodiy qudratini oshirishga xizmat qilmoqda. Qizilqum bag‘ridagi bu korxonaning zamonaviy texnologiyalarga asoslangan barcha bo‘linmalarida ish bir zum ham to‘xtamaydi. Ishchi-xodimlarning faoliyati belgilangan reja asosida kecha-yu kunduz bir maromda davom etmoqda. Ana shu mehnat tufayli kon boshqarmasi jamoasi kasb bayramini yaxshi natijalar bilan qarshi oldi.

Har bir sohada investitsion loyihalar alohida ahamiyat kasb etadi hamda ishlab chiqarish ko‘lamining kengayishiga imkon beradi. “Kokpatas va Dovgiztov oltin konlarida ma’dan qazib olish (III-navbati)” investitsion loyihasi nafaqat kon boshqarmamiz, balki kombinat rivojiga qaratilgan istiqbolli loyihalardan biridir. Ayni paytda ushbu loyiha asosida 3-gidrometallurgiya zavodida 2 ta yangi tegirmon bloki barpo etilmoqda. Ularning foydalanishga topshirilishi bilan tegirmonlar soni 8 taga yetadi. Zavod quvvatini yanada oshirish, ma’danni qayta ishlash hajmini 10 million tonnaga yetkazish rejalashtirilyapti.

Eng quvonchlisi, joriy yilda yarim tayyor mahsulot ishlab chiqarish hajmini 12 foizga ko‘paytirish mo‘ljallanmoqda. Yaqin kelajakda flotatsiya, shuningdek, biooksidlash, filtrlash, quritish va kuydirish sexlarini kengaytirish ham ko‘zda tutilgan. Loyiha tannarxini arzonlashtirish maqsadida, tegirmon bloklarini barpo etishga mo‘ljallangan aksariyat qurilish materiallari, jihoz va ehtiyot qismlar o‘zimizda mahaliylashtirilib, Zarafshon qurilish boshqarmasi, Navoiy mashinasozlik zavodi va bizning bo‘linmalarda ishlab chiqarilmoqda.

Shimoliy kon boshqarmasida joriy yilning to‘rt oylik yakunlari jamoa bor imkoniyatlarini ishga solayotganidan dalolat beryapti. Jumladan, tog‘ jinsini qazib olish hajmi kon ishlarini rivojlantirish rejasiga nisbatan 108,2 foizga bajarildi va o‘tgan yilning joriy davriga nisbatan 111 foiz o‘sish sur’ati ta’minlandi. Burg‘ilash ishlari rejasi 108, sulfidli ma’dan qazib olish rejasi 118,7, 3-gidrometallurgiya zavodiga sulfidli ma’dan yuklash rejasi 105,3 foizga uddalandi. Ochiq kon ishlarida iqtisodiy ko‘rsatkichlar o‘sayotganligi va rejalar ado etilayotganligi ishchi-xodimlar ish sharoitlarining yaxshilanishiga imkon yaratyapti.

“Sharqiy” va “Dovgiztov” konlari dispetcherlik xonalariga zamon talabiga mos ravishda zamonaviy kompyuterlar va interaktiv doskalar o‘rnatildi. “Dovgiztov” konida davriy uzluksiz texnologiyasi majmuasi magistral konveyyeri 2,2 kilometrga uzaytirildi. Natijada og‘ir yuk tashuvchi avtoag‘dargichlarning dizel yoqilg‘isi, moy mahsulotlari, avtoshina va boshqa turdagi tovar-moddiy boyliklar ortiqcha sarfining oldi olinmoqda. “Adjibugut” konida sanoat maydoni infratuzilmasi, xodimlar uchun dam olish xonalari va 5-AYoQSh ishga tushirildi. Hozirgi kunda “Dovgiztov” karyerini kengaytirish ishlari olib borilmoqda. “Boshqarma konlarini texnik va texnologik qayta jihozlash” ishchi loyihasi doirasida kovshining hajmi 7 kubometr bo‘lgan 2 dona zamonaviy “Liebxerr 9100” rusumli gidravlik ekskavatorlari keltirildi.

Kon boshqarmasi istiqbolini ko‘zlab, “Sharqiy” ochiq usulda qazib olish koni va Avtomobil transporti boshqarmasida “BSG” kompaniyasi hamkorligida kon ishlarining ish unumdorligini va samaradorligini oshirish bo‘yicha qator yo‘nalishlar bo‘yicha ishlar olib borilmoqda. Yaqin kunlarda “Sharqiy” konida ishchi-xodimlar uchun 250 o‘rinli oshxona foydalanishga topshiriladi. “Mag‘ribkon” konini o‘zlashtirish loyihasi doirasida yuk ko‘tarish quvvati 90 tonna bo‘lgan 3 dona va yuk ko‘tarish quvvati 55 tonna bo‘lgan 1 dona avtoag‘dargich olinishi ko‘zda tutilgan. Markaziy-moddiy texnika bazasida Zarafshon qurilish boshqarmasi tomonidan 100 tonnalik avtomobil tarozilarini o‘rnatish yuzasidan qurilish-montaj ishlar amalga oshirilmoqda.

Keyingi yillarda amalga oshirilayotgan ishlarga xolisona baho berib, ishonch bilan aytish mumkinki, bunday bunyodkorliklarga haqiqiy professionallar, o‘z kasbining ustalari, ko‘zlangan maqsadlarga yetishish yo‘lida jipslashgan jamoa va malakali mutaxassislar qodirdir. Ahil jamoamiz bilan mamlakatimiz hukumati tomonidan qo‘yilgan vazifalarni bajarishga qat’iy kirishganmiz. Kombinatning kelajagi ulug‘vor, istiqbollar uchun poydevori mustahkam. Biz esa har kungi sharafli mehnatimiz bilan nurli istiqbolni tobora yaqinlashtirib borayapmiz.

Naim AMONOV,

“NKMK” AJ Shimoliy kon boshqarmasi direktori.