Tarix

Navoiy kon-metallurgiya kombinati 1958-yil 1-sentabrda tashkil topgan. O‘sha yili buyuk o‘zbek shoiri, mutafakkir va davlat arbobi Alisher Navoiy nomi bilan atalgan Navoiy shahriga asos solindi. Minglab ishchilar, muhandislar, olimlar va rahbarlarning fidokorona mehnati tufayli Qizilqum sahrosida zamonaviy infratuzilmaga ega shaharlar barpo etildi. Bugun Navoiy, Zarafshon va Uchquduq shaharlari sahro bag‘ridagi yashil vohalarga aylangan.

“Muruntov” konining ochilishi xalqaro geologik jamoatchilik tomonidan XX asrning ikkinchi yarmidagi qimmatbaho metallar sohasida qilingan eng katta kashfiyot sifatida tan olindi. Oltin zaxiralarining ko‘pligi, maʼdan qazib olish texnologik sharoitlarining qulayligi uchun kon “Asr moʻjizasi” deb tan olindi.

1967-yil 1-martda “Muruntov” konida birinchi portlatish amalga oshirildi va konni ochiq usulda o‘zlashtirish boshlandi. 1969-yil 21-iyulda 2-gidrometallurgiya zavodida “Muruntov” konida qazib olingan maʼdandan 11 kg. 820 gr. bo‘lgan birinchi oltin yombisi olindi. Qizilqum hududi O‘zbekistondagi eng yirik oltin qazib oluvchi vohaga aylandi.

Mustaqillik yillarida NKMK tomonidan jahon bozorida raqobatbardosh mahsulot ishlab chiqarish uchun yangi ishlab chiqarish korxonalari ishga tushirildi, eng zamonaviy texnologiyalar va ilm-fanning so‘nggi yutuqlari amaliyotga tatbiq etildi.

Shu tufayli so‘nggi yillarda Navoiy kon-metallurgiya kombinati jahonda oltin ishlab chiqaruvchi yirik kompaniyalar to‘rttaligidan joy oldi. Kombinat yer osti boyliklari zaxiralarini geologik qidirish, qazib olish va qayta ishlashdan to tayyor mahsulot olishgacha bo‘lgan ishlab chiqarish jarayonlari to‘liq amalga oshiriladigan yirik sanoat klasteridir. NKMKning “999,9” soflikdagi oltin quymalari jahonning qimmatbaho metallar bo‘yicha birjalarida O‘zbekistonning brendiga aylandi.