Barpo etilayotgan 6-gidrometallurgiya zavodi to‘liq avtomatlashtiriladi
Yaratildi: 22.02.2023
Yangilandi: 22.02.2023
O'qildi: 4276
Barpo etilayotgan 6-gidrometallurgiya zavodi to‘liq avtomatlashtiriladi
“Raqamli O‘zbekiston – 2030” strategiyasi doirasida “2020-2022-yillarda NKMKni raqamli transformatsiya qilish dasturi” ishlab chiqilgan edi. Mazkur dasturga ko‘ra, “NKMK” AJ Ishlab chiqarishni avtomatlashtirish boshqarmasi tomonidan kombinatning ishlab chiqarish jarayonlariga raqamli texnologiyalarni joriy etish bo‘yicha 27 ta loyiha amalga oshirildi.
Jumladan, 2022-yilda amalga oshirilgan “Metallurgiya texnologik jarayonlarini boshqarish intellektual tizimi” loyihasi doirasida 5- va 7-gidrometallurgiya zavodlarining operativ dispetcherlik punktida avtomatlashtirilgan intellektual boshqaruv tizimlari joriy etildi.
Joriy yilda ham Ishlab chiqarishni avtomatlashtirish boshqarmasi tomonidan 6-gidrometallurgiya zavodi 1-tegirmon blokida texnologik jarayonlarning avtomatlashtirilgan boshqaruv tizimini (SCADA) joriy qilish bo‘yicha ishlar davom etmoqda.
Loyiha doirasida texnologik jarayonlarni rakamlashtirish tizimlari, avtomatlashtirish shkaflarini tayyorlash, dasturiy taʼminotini ishlab chiqish hamda uskunalarni o‘rnatish, sozlash va ishga tushirish ishlari bajariladi. Bugungi kunga qadar umumiy qiymati 6,5 milliard so‘m bo‘lgan raqamlashtirish ishlari bajarildi. Jumladan, gidrometallurgiya texnologik jarayonlarning reglamentiga asosan intellektual dasturlar yaratildi, 12 dona avtomatlashtirish shkafi va 579 dona elektr shkaflar ishlab chiqildi.
Nurota tumani hududidagi “Pistali” koni negizida barpo etilayotgan 6-gidrometallurgiya zavodi kombinat mutaxassislari ishtirokida to‘liq avtomatlashtirilgan boshqarish tizimiga o‘tadi. Bu esa, ishlab chiqarishda yuqori samaradorlikni taʼminlash bilan bir qatorda inson omilini kamaytirishga xizmat qiladi.