Korrupsiyaga qarshi kurashish agentligi vakillari kombinatga tashrif buyurdi
Yaratildi: 28.09.2023
Yangilandi: 28.09.2023
O'qildi: 3210
Korrupsiyaga qarshi kurashish agentligi vakillari kombinatga tashrif buyurdi
O‘zbekiston Respublikasi Korrupsiyaga qarshi kurashish agentligi direktori A.Burxanov boshchiligidagi ishchi guruh Navoiy viloyatida korrupsiyaga qarshi kurashish borasida amalga oshirilayotgan ishlar holati bilan tanishish yuzasidan o‘rganishlar o‘tkazdi.
Ishchi guruh vakillari “Navoiy kon-metallurgiya kombinati” aksiyadorlik jamiyatidagi ishlab chiqarish jarayonlari bilan yaqindan tanishish maqsadida dunyodagi eng yirik oltin konlardan biri – “Muruntov” koni hamda 2-gidrometallurgiya zavodida bo‘lishdi.
Korrupsiyaga qarshi kurashish agentligi direktori A.Burxanov boshchiligidagi ishchi guruh vakillari “Muruntov” konida oltin tarkibli maʼdan qazib olish jarayoni hamda 2-GMZda joylashgan Markaziy kon boshqarmasida ishlab chiqarishning raqamlashtirilgan yagona boshqaruv markazi faoliyati bilan tanishtirildi. Taʼkidlanganidek, mazkur markazning asosiy vazifasi geologik-qidiruv ishlari, maʼdanni qazib olish, tashish va gidrometallurgiya zavodlarida qayta ishlash jarayonlarini to‘liq kuzatib borish, tahlil qilish va boshqarishdan iboratdir.
Ishchi guruh vakillari tomonidan Navoiy kon-metallurgiya kombinatidagi ishlab chiqarish jarayonlari yuqori darajada raqamlashtirilganligi va korxonada zamonaviy axborot texnologiyalari keng joriy etilganligi alohida taʼkidlandi.