“Pistali” konida 10 mln kubometr tog‘ jinslari qazib olindi
Yaratildi: 27.12.2023
Yangilandi: 27.12.2023
O'qildi: 2878
“Pistali” konida 10 mln kubometr tog‘ jinslari qazib olindi
2023-yilda Navoiy kon-metallurgiya kombinati tomonidan Nurota tumanidagi “Pistali” koni negizida yiliga 4 mln tonna oltin maʼdanni qayta ishlash quvvatiga ega 6-gidrometallurgiya zavodini qurishga qaratilgan yirik investitsion loyihani amalga oshirish bo‘yicha keng ko‘lamli ishlar amalga oshirildi.
Xususan, joriy yilning 6-yanvar kuni “Pistali” konida oltin maʼdan tanalarini ochish uchun ilk portlatish ishlari bajarilgandi. O‘zbekiston Respublikasi davlat mustaqilligining o‘ttiz ikki yillik bayrami arafasida 6-gidrometallurgiya zavodida tegirmon bloklari ishga tushirilib, bu o‘z navbatida rejalashtirilgan ishlab chiqarish ko‘rsatkichlariga erishish imkonini berdi.
20-dekabr kuni “Qizilqum” kon boshqarmasi solnomasida tarixiy kun sifatida muhrlanib qoladi yaʼni “Pistali” konidan qazib chiqarilgan tog‘ jinslari hajmi 10 mln kubometrni tashkil etib, shundan 2,3 mln tonnasi oltin maʼdanidir.
Bugungi kunda “Pistali” konida 1,3 ming nafar ishchi-xizmatchi, muhandis-texnik xodim faoliyat ko‘rsatayapti. Konda maʼdan qazib olish ishlarida ekskavatorlar, avtoag‘dargichlar, burg‘ilash uskunalari, yuklagichlar kabi zamonaviy konchilik texnikalaridan keng foydalanilmoqda.
Ushbu istiqbolli loyiha hududning infratuzilmasini yaxshilash bilan birga, mamlakatimiz iqtisodini rivojlantirishga ham xizmat qiladi.