• Yaratildi: 03.05.2024
• Yangilandi: 03.05.2024
• O'qildi: 2696

Sex zavod sifatida faoliyat boshladi

“NKMK” AJ Markaziy kon boshqarmasining yetakchi korxonalaridan biri – Markaziy taʼmirlash-mexanika sexi joriy yilning 1-may kunidan Zarafshon taʼmirlash-mexanika zavodi sifatida faoliyat boshladi.

O‘n oltita uchastka, byuro va xizmatlardan tarkib topgan va qariyb 600 nafar ishchi-xodim mehnat qilayotgan zavodda texnologik uskunalarni taʼmirlash, ehtiyot qismlar va metall konstruksiyalarni tayyorlash, taʼmirlash-montaj ishlari olib borilayapti. 2023-yilda 181 mlrd so‘mlik mahsulot ishlab chiqarilgani zavodning faoliyat ko‘lami qanchalik keng ekanligidan darak beradi.

- Korxona faoliyatida mahalliylashtirish dasturi muhim o‘rin tutadi. Yangi mahsulotlar turlarini o‘zlashtirish hisobiga ishlab chiqarish quvvati yildan-yilga oshib borayapti. Shu bois sex yirik zavodga aylandi. Bugungi kunda 1 ming turdan ortiq mahalliylashtirilgan, 3 ming turdan ziyod import o‘rnini bosuvchi mahsulotlar ishlab chiqarilmoqda. Joriy yilda zavodimiz jamoasi mahsulot ishlab chiqarish hajmini 200 mlrd so‘mga yetkazishni rejalashtirgan, - dedi Zarafshon taʼmirlash-mexanika zavodi direktori Yo‘ldosh G‘aniyev.

Taʼkidlash joizki, Navoiy kon-metallurgiya kombinati ijtimoiy masʼuliyatni zimmasiga olib, hududlarni ijtimoiy-iqtisodiy rivojlantirish, yangi korxonalar, qo‘shimcha ish o‘rinlarini tashkil etish, aholini ish bilan taʼminlashga alohida eʼtibor qaratmoqda.

Misol uchun, 2021-yilda Xorazm viloyati Tuproqqalʼa tumanining “Sarimoy” mahallasida Markaziy taʼmirlash-mexanika sexi tarkibida 40 ta yangi ish o‘ringa ega payvandlash-mexanika uchastkasi tashkil etilgandi. Ayni damda ushbu uchastkada mehnat qilayotgan 90 nafar ishchi-xodimlarning asosiy qismi mahalliy aholi vakillaridir. Ular bu yerda ish boshlashdan oldin kombinatning Zarafshon shahridagi O‘quv markazida uch oylik o‘quv dasturi bo‘yicha kasb sirlarini o‘rganib, Markaziy taʼmirlash-mexanika sexida amaliyot o‘tashgan.

Kelgusida mazkur zavodda ish ko‘lami yanada kengayishi ishlab chiqarish hajmining oshishi hamda mahalliylashtirilgan, import o‘rnini bosuvchi mahsulotlar turlarining ko‘payishiga xizmat qiladi.

“NKMK” AJ Matbuot xizmati.