• Yaratildi: 27.06.2024
• Yangilandi: 27.06.2024
• O'qildi: 971

Tatariston delegatsiyasi kombinatga tashrif buyurdi

Ta’kidlash joizki, keyingi yillarda O‘zbekiston va Tatariston o‘rtasida yo‘lga qo‘yilgan do‘stona munosabatlar, turli sohalarda mustahkam aloqalar kengayib, o‘zaro sherikchilik bo‘yicha faol hamkorlik kuzatilmoqda. Bu borada ikki tomon delegatsiyalari, ishbilarmonlari uchrashuvlari, amaliy tashriflari hamkorlikni yangi bosqichga olib chiqmoqda.

Shu kunlarda viloyatimizda bo‘lib turgan Tatariston Respublikasi Raisi Rustam Minnixanov boshchiligidagi delegatsiya vakillari Navoiy mashinasozlik zavodida bo‘lib, yirik korxona faoliyati bilan ham yaqindan tanishdi.

Uchrashuv avvalida vakillarimiz mehmonlarga Navoiy kon-metallurgiya kombinati va uning iqtisodiy salohiyati, zavodda mahalliylashtirish va import o‘rnini bosuvchi mahsulotlar ishlab chiqarish, bu borada erishilgan natijalar va kelgusidagi ustuvor vazifalar haqida batafsil ma’lumot berdi. Muloqotda mazkur zavodda ayni paytda 3,5 ming nafar muhandis-texnologlar, mexaniklar, konstruktorlar, metallurglar va boshqa soha vakillari mehnat qilayotgani, 15 ming turdan ortiq yuqori sifatli mahsulotlar ishlab chiqarilayotgani, so‘nggi yillarda ko‘plab mahsulot turlari o‘zlashtirilgani qayd etib o‘tildi.

Shundan so‘ng delegatsiya vakillari o‘tgan yili “Mexanika-yig‘uv sexini texnik va texnologik qayta jihozlash (1-bosqich)” investitsion loyihasi asosida foydalanishga topshirilgan  mexanika-yig‘uv sexida bo‘lib, zamonaviy uskunlar bilan jihozlangan sex faoliyati bilan tanishdi.

- Uchrashuv har ikki tomon vakillari uchun samimiy ruhda kechdi. Ayniqsa, kombinatda mahalliylashtirish dasturi doirasida olib borilayotgan ishlar, erishilayotgan natijalar, istiqboldagi rejalar, shu jumladan, zavodimiz  faoliyati mehmonlarda juda katta taassurot qoldirdi, - deydi zavod bosh muhandisi Karimjon Abdullayev. - Shuningdek, o‘zaro muloqotda kelgusida sohaga doir hamkorlikni yo‘lga qo‘yish masalasini ko‘rib chiqishga kelishildi.

“NKMK” AJ Matbuot xizmati