• Yaratildi: 31.07.2024
• Yangilandi: 31.07.2024
• O'qildi: 622

Kombinat faoliyatida temir yo‘l transporti muhim ahamiyatga ega

Avgust oyining birinchi yakshanbasi –

O‘zbekiston Respublikasi temir yo‘l transporti xodimlari kuni 

Navoiy kon-metallurgiya kombinati faoliyatida temir yo‘l transporti muhim ahamiyatga ega. Keyingi yillarda bu sohada juda katta ishlar amalga oshirildi. O‘zbekiston Respublikasi temir yo‘l transporti xodimlari kuni oldidan yutuq va kelgusidagi rejalar haqida “NKMK” AJ Temir yo‘l transporti bo‘limi boshlig‘i Zafar Sayemov quyidagilarni maʼlum qildi:

“Bugungi kunda kombinat tarkibida 1 ta boshqarma (Markaziy kon boshqarmasida Temir yo‘l transporti boshqarmasi) va 2 ta temir yo‘l sexi (Shimoliy va “Qizilqum” kon boshqarmalarida Temir yo‘l sexlari) faoliyat olib bormoqda.

Ayni paytda korxonada 2 ming nafarga yaqin soha xodimlari faoliyat olib borishmoqda. Kombinat balansidagi temir yo‘llarning umumiy uzunligi 450 kilometrdan ortiq. Yuklar va yo‘lovchilarni tashish ishlariga 54 ta magistral va manyovr teplovoz, 878 ta yuk tashish va 17 ta yo‘lovchi tashish vagon jalb qilingan.

Ta’kidlash joizki, bugun kombinatda ma’dan tashish hajmining katta qismi aynan shu soha hissasiga to‘g‘ri keladi. Temir yo‘llar orqali kon va karyerlardan gidrometallurgiya zavodlariga ma’danlar hech qanday to‘xtalishlarsiz yetkazib berilmoqda. Yangi temir yo‘llar qurilishi, texnikalar olinishi hisobiga yuk va yo‘lovchi tashish ko‘rsatkichlari yildan-yilga o‘sib bormoqda. Xususan, 2023-yilda temir yo‘l transporti orqali har xil turdagi 75,4 mln. tonna yuklar tashilgan bo‘lsa, joriy yilning 6 oyi davomida bu ko‘rsatkich 34,9 mln. tonnani tashkil qildi.

2021-2023-yillarda “Turbay”, “Balpantov” va “Tomdibuloq” konlarini gidrometallurgiya zavodlari bilan bog‘lovchi yangi temir yo‘l liniyalari qurilishi, respublikamizda birinchilardan bo‘lib “2TE25KM” rusumli 10 ta zamonaviy ikki seksiyali teplovozlar olib kelinishi soha rivojida muhim ahamiyatga ega bo‘ldi.

Ayni paytda “Bessopan” sanoat maydonida rekonstruksiya qilish ishlari olib borilmoqda. Buning natijasida kelgusi yilda temir yo‘l transporti orqali Oltinni uyumda eritmaga o‘tkazish sexiga 12 mln. tonna ma’dan tashishni yo‘lga qo‘yish rejalashtirilgan. “Uchquduq” maydonida “Kokpatas va Dovgiztov” oltin konlarida ma’dan qazib olish (III navbati)” investitsion loyihasi doirasida 1 ta magistral, 1 ta manyovr teplovoz va 60 ta yuk tashish vagoni olib kelinishi ko‘zda tutilgan.

Temiryo‘lchi bo‘lish uchun temir iroda kerak. Bu sohada ishlash katta mas’uliyat talab etadi. Temiryo‘lchiman, deyish faxr. Niyatim – barchamiz shu ulug‘ yurtga, shu farovon, tinch hayotga, shu buyuk elga munosib bo‘lish. Fursatdan foydalanib, barcha hamkasblarimizni sharafli ayyom bilan qizg‘in muborakbod etaman!”

“NKMK” AJ Matbuot xizmati.