• Yaratildi: 05.08.2024
• Yangilandi: 05.08.2024
• O'qildi: 232

“Pistali” konida 18 mln. kubometr tog‘ jinslari qazib olindi

Xabaringiz bor, 2023-yilning 6-yanvar kuni Nurota tumanidagi “Pistali” konida ilk portlatish amalga oshirilgan edi. Albatta, bugungi kunda ishlab chiqarish jarayonlarni zamonaviy texnikalarsiz tasavvur qilish qiyin. Ayni vaqtda kon majmuasining mustahkam moddiy-texnika bazasi yaratilgan.

Jumladan, konda “Epiroc” rusumli zamonaviy burg‘ilash uskunalari, “Liebherr”, “Hitachi” rusumdagi ekskavatorlar, 55 va 90 tonna yuk ko‘tarish quvvatiga ega “Komatsu” rusumli avtoag‘dargichlar, ma’dan yuklagich va boshqa turdagi kon texnikalari mavjud.

“Pistali” konida tog‘ jinslarni qazib olish rejasi muddatidan oldin bajarib kelinayotganligi e’tirofga sazovordir. Kondan qazib chiqarilgan tog‘ jinslari hajmi shu davrga qadar 18 mln. kubometrdan oshdi. 2023-yilda 10,5 mln. kubometr tog‘ jinslari qazib chiqarilgan bo‘lsa, 2024-yilning birinchi yarim yilligida bu ko‘satkich qariyb 7,5 mln. kubometrni tashkil etdi.

Hozirda “Pistali” sanoat maydonida minglab ishchi-xizmatchi, muhandis-texnik xodimlar faoliyat ko‘rsatyapti. Majmua tarkibidagi 6-gidrometallurgiya zavodi, kon uskunalarini ta’mirlash sexi, avtosaroy, ishchilar shaharchasi va boshqa obyektlar qurilib, foydalanishga topshirildi.

Shuningdek, konda ishlab chiqarish rejalarini o‘z vaqtida bajarilishini ta’minlash, ishlab chiqarish samaradorligini oshirish hamda ish jarayonida ilg‘or zamonaviy texnikalarni tatbiq etishda kon boshlig‘i Muhiddin Ro‘ziboyev rahbarligidagi jamoaning hissasi katta bo‘lmoqda.

“NKMK” AJ Matbuot xizmati.