• Yaratildi: 14.08.2024
• Yangilandi: 14.08.2024
• O'qildi: 201

Qayta ishlash majmuasining ishlab chiqarish korxonalari

Konchilik va metallurgiya sanoati boy mineral xomashyo bazasiga ega O‘zbekiston iqtisodiyotining eng muhim tarmog‘i bo‘lib, mamlakatimiz sanoat salohiyatini shakllantiradi.

Navoiy kon-metallurgiya kombinati ko‘plab oltin ishlab chiqaruvchi kompaniyalardan farqli o‘laroq, geologiya-qidiruv ishlaridan to tayyor mahsulot olishgacha bo‘lgan ishlab chiqarish jarayonlari to‘liq amalga oshiriladigan sanoat klasteridir.

Qayta ishlash majmuasi NKMK ishlab chiqarish tarkibida eng muhim o‘rinni egallaydi. Ayni paytda 1, 2, 3, 4, 5, 6, 7-gidrometallurgiya zavodlari, oltin va kumushni uyumda ishqorlash sexlari, Marjonbuloq oltin ajratish sexi kabi oltin tarkibli ma’danlarni qayta ishlaydigan o‘nta ishlab chiqarish korxonasi faoliyat ko‘rsatmoqda.

Qayta ishlash majmuasining har bir bo‘linmasi qo‘llaniladigan texnologik jarayonlar, ularda qayta ishlanadigan oltin tarkibli ma’danlarning xususiyatlari bo‘yicha o‘ziga xos bo‘lib, har biriga qimmatbaho metallarni ajratib olishning kerakli ko‘rsatkichini ta’minlaydigan individual yondashuv va qayta ishlash sxemasini talab qiladi.

Kombinat tomonidan ishlab chiqarish quvvatlari yildan-yilga oshirib borilmoqda. Jumladan, 2008-yilda yiliga 52 mln. tonna ma’dan qayta ishlangan boʻlsa, 2023-yilda bu ko‘rsatkich 96 mln. tonnadan ortiqni tashkil etdi. 2024-yilda esa 100 mln. tonna ma’dan qayta ishlash rejalashtirilgan.

Ayni paytda Yangi O‘zbekistonning so‘nggi yillarda ishga tushirilgan zavodlari respublikamiz iqtisodiyotini rivojlantirish, xalqimiz farovonligini yuksaltirishga xizmat qilmoqda.

Bugungi kunda zamonaviy zavodlardagi murakkab texnologik jarayonlarni mahalliy kadrlar boshqarayotgani, ularning aksariyati mustaqillik yillarida kamol topib, ma’lum ish tajribasiga ega bo‘lganligi sababli kombinat kelajagi ishonchli qo‘llarda deyishga barcha asoslar bor.

“NKMK” AJ Matbuot xizmati.