• Yaratildi: 26.08.2024
• Yangilandi: 26.08.2024
• O'qildi: 661

Davlat mukofotlari muborak bo‘lsin!

Mustaqilligimizning o‘ttiz uch yilligi ko‘pming kishilik Navoiy kon-metallurgiya kombinati jamoasi uchun quvonchli xushxabarlar bilan boshlandi. O‘zbekiston Respublikasi Prezidentining Farmonlariga muvofiq, bir guruh hamkasblarimiz davlatimizning yuksak mukofotlari bilan taqdirlandi.

“NKMK” AJ bosh geologi Sergey Rudnev “O‘zbekiston Respublikasida xizmat ko‘rsatgan geolog” faxriy unvoni, 2-gidrometallurgiya zavodi apparatchisi Abduvali Qayumov “Mehnat shuhrati” ordeni, “Muruntov” transport sexi avtosamasval haydovchisi Zokir Norov “Shuhrat” medali, shuningdek, “Farhod” madaniyat saroyi direktorining o‘rinbosari, xonanda Sherzod Davronov “Do‘stlik” ordeni bilan mukofotlandi.

Eng ulug‘, eng aziz bayram arafasida O‘zbekiston faxriylarining ijtimoiy faoliyatini qo‘llab-quvvatlash “Nuroniy” jamg‘armasi Vasiylik Kengashi qarori bilan “NKMK” AJ Maʼmuriy masalalar bo‘yicha direktori Nurmat Jo‘libekov ham II darajali “Mehnat faxriysi” ko‘krak nishoni bilan taqdirlangan edi.

Bugun kombinatga ushbu mukofot sohiblari taklif etilib, ularni tabriklash marosimi bo‘lib o‘tdi. Tadbirda “NKMK” AJ Boshqaruvi raisi – Bosh direktori Q.Sanaqulov so‘z olib, mustaqilligimizning ahamiyati, keyingi yillarda qo‘lga kiritilgan yutuqlar, ko‘pming kishilik jamoamiz ilg‘orlari har doim eʼtiborda ekanligini eʼtirof etgan holda, barcha sovrindorlarni muborakbod etdi.

“Mehnat shuhrati” ordeni sohibi Abduvali Qayumov:

Men shunday tinch-osuda, farovon yurtda yashayotganimdan, kombinatdek ulug‘ bir dargohda ishlayotganimdan faxrlanaman. Mustaqillik va kombinat barcha orzu-niyatlarim ushalishiga katta imkon berdi. Istiqlolning 33 yilligi hayotim va faoliyatimda chuqur iz qoldirdi. Mehnatim yuksak mukofotga loyiq topildi.

“NKMK” AJ Matbuot xizmati.