• Yaratildi: 28.08.2024
• Yangilandi: 28.08.2024
• O'qildi: 385

Energiya tejamkorlik – davr talabi!

Joriy yilning 27-avgust kuni O‘zbekiston Respublikasi Prezidenti Shavkat Mirziyoyev raisligida energiya tejamkorligini taʼminlash, muqobil quvvatlardan foydalanishni kengaytirish masalalari muhokamasi bo‘yicha yig‘ilish o‘tkazilgan edi.

Mazkur yig‘ilishda mamlakatimizda energiya resurslariga bo‘lgan talab yildan-yilga oshib borayotgani taʼkidlanib, hududlarda elektr energiyasi va tabiiy gazni tejash, muqobil energiya manbalarini o‘rnatish bo‘yicha belgilangan chora-tadbirlar ijrosi muqokama etilib, ustuvor vazifalar belgilab berildi.

Ushbu yig‘ilishda berilgan topshiriqlar ijrosini taʼminlash maqsadida, bugun Navoiy davlat konchilik va texnologiyalar universitetida Navoiy viloyati hokimligi, Navoiy kon-metallurgiya kombinati, viloyat  prokuraturasi, iqtisodiyot va energetika tarmoqlari vakillari, universitet olimlari ishtirokida hududda energiya tejamkor texnologiyalarni keng joriy etish bo‘yicha ilmiy hamkorlikni yo‘lga qo‘yishga qaratilgan yig‘ilish bo‘lib o‘tdi.

Viloyat hokimi o‘rinbosari E.Kamolov, viloyat prokurori A.Mirzayev va “NKMK” AJ Boshqaruvi raisi –  Bosh direktori Q.Sanaqulovlar ishtirokida o‘tgan tadbirda viloyatda elektr energiyasi va tabiiy gazni tejash, muqobil energiya manbalarini o‘rnatish bo‘yicha davlatimiz rahbari tomonidan belgilab berilgan topshiriqlarni amalga oshirish yuzasidan Ishchi guruh tuzilib, vazifalar belgilandi va ijrosi bo‘yicha doimiy monitoring olib borish yo‘lga qo‘yildi.

Tadbir doirasida Navoiy davlat konchilik va texnologiyalar universiteti xodimlari va olimlari tomonidan ilmiy yondashuv asosida energiya tejamkor texnologiyalardan foydalanishga bag‘ishlangan ko‘rgazma namoyish etildi, loyihalar taqdimoti o‘tkazildi.     

“NKMK” AJ Matbuot xizmati.