O'zbekiston Respublikasi, Navoiy viloyati, Navoiy sh., Navoiy ko'chasi 27
Du - Ju: 08:00 - 17:00
Dam olish kunlari: shanba,yakshanba
MUSTAQILLIK – ULUG‘ NE’MAT
- Bosh sahifa
- MUSTAQILLIK – ULUG‘ NE’MAT
- Yaratildi: 30.08.2024
- Yangilandi: 30.08.2024
- O'qildi: 152
MUSTAQILLIK – ULUG‘ NE’MAT
Qadrli hamkasblar!
Sizlarni eng ulug‘, eng aziz bayramimiz – O‘zbekiston Respublikasi mustaqilligining 33 yilligi munosabati bilan qizg‘in tabriklayman. Tom ma’noda ulug‘ ne’mat bo‘lgan Istiqlol, uning xalqimiz taqdirida tutgan o‘rni, mustaqillik sharofati tufayli O‘zbekistonni dunyo taniyotgani va e’tirof etayotgani, fuqarolarimizning turmushi farovonlashib borayotgani haqida hayajon va to‘lqinlanib gapirish, fikr bildirish har birimizga cheksiz quvonch, shodlik, qalbimizga g‘urur, iftixor bag‘ishlaydi.
Navoiy kon-metallurgiya kombinatining ko‘pming kishilik matonatli jamoasi har doimgidek ulug‘ ayyomni ulkan zafarlar bilan qarshi olmoqda. Kombinat tomonidan joriy yilning o‘tgan yetti oyida canoat mahsulotlari ishlab chiqarish hajmi 50,2 trillion so‘mni tashkil qilib, o‘sish sur’ati o‘tgan yilning mos davriga nisbatan 106,2 foizga ta’minlandi. Investitsiya dasturi doirasida 402 million dollar mablag‘lar o‘zlashtirilib, o‘tgan davrga nisbatan 1,5 barobarga oshdi. Kombinat bo‘linmalarida 172 ta loyiha bo‘yicha ishlab chiqarilgan mahalliylashtirilgan mahsulot hajmi 535 milliard so‘mni tashkil qilib, o‘sish sur’ati 137,5 foizni tashkil etdi. Kombinat sof foydasi 11,1 trillion so‘mni tashkil etib, prognoz ko‘rsatkich 125,7 foizga bajarildi. Budjetga 19,1 trillion so‘m miqdorida soliqlar va dividendlar to‘lab berildi. Bu, prognozga nisbatan 500 milliard so‘mga ko‘p demakdir.
Mustaqillikning beqiyos ahamiyatini barchamiz yaxshi bilamiz. Ajdodlarimizning azaliy orzusi bo‘lgan Istiqlol bugun davlatchilik va tinchligimiz timsoli, huquqlarimiz, farovonlik hamda baxtli kelajagimiz kafolati bo‘lib kelmoqda.
Bugungi kunda O‘zbekiston brendi ostida ishlab chiqarilayotgan “999,9” tamg‘ali oltin jahon bozorida o‘zining sifati, raqobatbardoshliligi hamda tannarxi nisbatan arzonligi bilan boshqa kompaniyalarnikidan ajralib turadi. Kombinatning dunyodagi boshqa oltin qazib oluvchi kompaniyalardan farqi shuki, bu yirik korxona geologiya-qidiruv, ma’danni qazib olish va qayta ishlashdan tortib, jahon bozori talablariga javob bera oladigan tayyor mahsulotlarni ishlab chiqarishgacha bo‘lgan noyob ishlab chiqarish tizimiga ega sanoat klasteridir.
Davlatimiz rahbarining 2017-yil 1-martdagi qarori bilan tasdiqlangan 2017-2026-yillarda qimmatbaho metallar ishlab chiqarishni ko‘paytirish dasturi korxona taraqqiyotida yangi bosqichni boshlab berdi. Ushbu dastur asosida keyingi yillarda amalga oshirilgan investitsion loyihalar kombinatning barqaror rivojlanishini ta’minlashda keng imkoniyat va istiqbollar yaratdi. Natijada Navoiy kon-metallurgiya kombinati oltin ishlab chiqaruvchi kompaniyalar bilan bemalol raqobatlasha oladigan zamonaviy korxonaga aylandi.
2017-2023-yillar mobaynida umumiy qiymati 2,9 milliard dollar bo‘lgan 23 ta yirik investitsion loyiha ishga tushirildi. Buning evaziga kombinatda 2016-yilga nisbatan ma’dan qazib olish hajmi 2,5 barobar, ma’danni qayta ishlash 1,6 barobar, oltin ishlab chiqarish 26 foizga, kumush esa 47 foizga oshdi. Oltin ishlab chiqarish hajmini oshirishga qaratilgan aniq chora-tadbirlar, yangi ishlab chiqarish quvvatlari foydalanishga topshirilishi tufayli kombinat oltin ishlab chiqarish bo‘yicha jahonning TOP-10 ta kompaniyalari safida 2016-yildagi yettinchi o‘rindan 2022-yilda to‘rtinchi o‘ringa ko‘tarildi. Shu yillarda 15 ming 243 ta yangi ish o‘rni yaratildi. Bu kombinat tarixida keyingi yillarda erishilgan eng katta yutuqdir.
Investitsion loyihalarni jadallashtirish hisobiga 2017-2026-yillarga mo‘ljallangan dasturni muddatidan ikki yil oldin – 2024-yilda yakunlash rejalashtirilmoqda. Bunda, shak-shubhasiz, korxonada mehnat qilayotgan qariyb 50 ming nafarga yaqin muhandistexnologlar, ishchi-xodimlarning hissasi bor, albatta.
Ma’lumki, kombinat nafaqat O‘zbekiston, balki butun dunyoga sifatli oltin quymalari bilan tanilgan ko‘p tarmoqli sanoat korxonasidir. Ayni paytda bu yerda qimmatbaho metallar bilan birga, mahalliylashtirilgan va import o‘rnini bosuvchi mahsulotlar, jumladan, stanoklar, qurilish materiallari, gidrometallurgiya zavodlari, kon-shaxtalar, texnikalar uchun zarur bo‘lgan uskuna, jihoz, metalkonstruksiyalar, ehtiyot qismlar ishlab chiqarish tizimli yo‘lga qo‘yilgan.
Navoiy mashinasozlik zavodida ishlab chiqarilayotgan 15 ming turdan ortiq mahalliylashtirilgan va import o‘rnini bosuvchi mahsulotlarning 97 foizi bugun kombinat ehtiyojiga yo‘naltirilmoqda.
Korxonamiz faoliyatida investitsion loyihalar muhim o‘rin egallaydi. Bu boradagi ishlar joriy yilda ham davom etmoqda. Jumladan, 2024-yilda Investitsiya dasturi doirasida umumiy qiymati 1 milliard AQSh dollari bo‘lgan 11 ta loyiha amalga oshirilishi rejalashtirilgan.
Qutlug‘ bayram arafasida O‘zbekiston Respublikasi Prezidentining O‘zbekiston Respublikasi mustaqilligining 33 yilligi munosabati bilan davlat xizmatchilari hamda ishlab chiqarish va ijtimoiy sohalar xodimlaridan bir guruhini mukofotlash to‘g‘risidagi farmoni e’lon qilindi. Farmonga muvofiq, korxonamiz vakillari – “Navoiy kon-metallurgiya kombinati” aksiyadorlik jamiyati bosh geologi Sergey Vyacheslavovich Rudnev “O‘zbekiston Respublikasida xizmat ko‘rsatgan geolog” faxriy unvoni, 2-gidrometallurgiya zavodi apparatchisi Qayumov Abduvali Tojiyevich “Mehnat shuhrati” ordeni, “Muruntog‘” transport sexi avtosamosval haydovchisi Norov Zokir Shomonovich “Shuhrat” medali, shuningdek “Farhod” madaniyat saroyi direktorining o‘rinbosari, xonanda Davronov Sherzod Ravshanovich “Do‘stlik” ordeni bilan taqdirlandilar. Yuksak davlat mukofotlariga sazovor bo‘lgan hamkasblarimizni qo‘shaloq shodiyona munosabati bilan qizg‘in muborakbod etamiz.
Aziz hamkasblar!
Mustaqilligimizning 33 yilligi bayrami arafasida yutuqlarimizni sarhisob qilish barobarida yanada yuksak marralarni belgilab olganligimizni, bu Navoiy kon-metallurgiya kombinatida 2024-2030-yillar uchun strategik rivojlantirish dasturida o‘z ifodasini topganligini ham ta’kidlab o‘tmoqchiman. Dasturga muvofiq, 2030-yilda asosiy mahsulot ishlab chiqarishni 37 foizga oshirish mo‘ljallangan. Demakki, ishlab chiqarish sur’atini yanada oshirishimiz, har bir uchastkada qat’iy intizom, yuksak samaradorlikka erishishimiz talab etiladi. Ana shunday maqsadlar yo‘lida sizlarga kuch-g‘ayrat, xonadonlaringizga farovonlik, qut-baraka tilayman!
Mustaqillik bayrami barchamizga mubork bo‘lsin!
Quvondiq SANAQULOV,
“Navoiy kon-metallurgiya kombinati” AJ
Boshqaruvi raisi – Bosh direktori