• Yaratildi: 26.09.2024
• Yangilandi: 26.09.2024
• O'qildi: 247

Kombinatda gender tenglik masalasi alohida eʼtiborda

Nurobod shahridagi “Nurobod” madaniyat uyida Janubiy kon boshqarmasida faoliyat olib borayotgan ishchi-xodimlar uchun “Xotin-qizlar va erkaklar uchun teng huquq va imkoniyatlarni taʼminlash, tazyiq va zo‘ravonlik hamda jinoyatchilikning oldini olish” mavzusida seminar-trening bo‘lib o‘tdi.

Mazkur seminar-trening “NKMK” AJ Ayollar Kengashi tomonidan “NKMK jamg‘armasi” DM Oila va xotin-qizlar kengashi va Navoiy viloyat ichki ishlar boshqarmasi bilan hamkorlikda tashkil etildi.

Tadbirda so‘zga chiqganlar tomonidan yurtimizda 2030-yilgacha bo‘lgan davrda gender tenglikka erishish strategiyasi qabul qilingani, unda xotin-qizlar va erkaklar uchun teng imkoniyatlar yaratishga katta eʼtibor berilgani, mazkur strategiya bugungi kunda ham hayotga izchillik bilan tatbiq etib borilayotgani hamda bu borada Navoiy kon-metallurgiya kombinatida amalga oshirilayotgan ishlar haqida batafsil maʼlumotlar berildi.

Tadbirda “NKMK” AJ Ayollar Kengashi raisi Sabohat Nazarova taʼkidlaganidek:

“Gender tenglik Navoiy kon-metallurgiya kombinati faoliyatida muhim rol o‘ynaydi. Kombinat tomonidan “Gender tenglik va ayollar huquqlarini rag‘batlantirish tamoyillari” amalga oshirilmoqda. Joriy yilning avgust oyida “NKMK” AJ “International Women in Mining” (“IWiM” – tog‘-kon sanoatidagi Xalqaro ayollar tashkiloti) bilan hamkorlik o‘rnatib, ushbu tashkilotga O‘zbekistondan  qo‘shilgan birinchi hamkor kompaniya bo‘ldi. “IWiM” bilan hamkorlik kombinatda xotin-qizlarning kasbiy o‘sishi va yetakchilik fazilatlarini rivojlantirishga ko‘maklashadi.”

Kombinatda xotin-qizlar huquqlarini targ‘ib etish va himoya qilish, ularni o‘qitish va malakasini oshirish hamda iqtisodiy imkoniyatlarini kengaytirish korxonada hozirda amalga oshirilayotgan barqaror rivojlanishning ustuvor yo‘nalishlari biridir.

“NKMK” AJ Matbuot xizmati.