“Auminzo-Amantoy” konida qazib chiqarish surʼati oshirilmoqda
Yaratildi: 05.04.2022
Yangilandi: 05.04.2022
O'qildi: 3308
“Auminzo-Amantoy” konida qazib chiqarish surʼati oshirilmoqda
Bugungi kunda Navoiy kon-metallurgiya kombinatining istiqbollari haqida so‘z ketgudek bo‘lsa, “Auminzo-Amantoy” koni birinchi bo‘lib tilga olinadi. Bu yerda yer osti boyliklari zaxiralarini qidirib topish va ularni o‘zlashtirish surʼati shunga asos bo‘ladi.
2017-yilda foydalanishga topshirilgan konda qisqa davrda kon jinslarini qazib chiqarish hajmi qariyb o‘n olti baravar oshdi. Raqamlar bilan ifodalaganda dastlabki yildagi 3 mln kub metrdan 47,5 mln kub metrga yetdi. Birgina 2021-yilda bu ko‘rsatkich bo‘yicha reja 113,1 foizga bajarildi. Konda oksidli rudadan tashqari 1,4 mln tonna sulfidli ruda ham qazib chiqarildi. Investitsion loyihalar doirasida 5-gidrometallurgiya zavodining ishga tushirilishi Navoiy kon-metallurgiya kombinatidek ulkan korxona jamoasi hayotida ham katta voqea bo‘ldi. O‘tgan besh yilda oltin va kumush ishlab chiqarish rejasi bajarib kelinmoqda.
Joriy yilda kon mutaxassislari tomonidan “Uzunbuloq”, “Shimoliy-Markaziy Amantoytov”, “Asaukak”, “Nuqrakon”, “Shimoliy Dovgiztov”, “Ajibugut” singari 16 ta karyerda kon ishlari olib boriladi. Ruda qazib olish hajmini oshira borish uchun korxona mustahkam konchilik texnikasi bazasiga ega. Ayni paytda bu yerda Shvetsiya, Yaponiya kabi davlatlarning jahonga mashhur korxonalarida ishlab chiqarilgan 22 ta ekskavator va 15 ta burg‘ilash uskunalaridan foydalanilmoqda. Yil oxirigacha ishlab chiqarish unumdorligi yuqori bo‘lgan yana 3 ta ekskavator va 6 ta burg‘ilash uskunasini keltirib ishga tushirish rejalashtirilgan. Konning texnik xodimlari zamonaviy konchilik texnikasini taʼmirlash, ulardan samarali foydalanishda yetarli tajriba to‘plaganligi ishda yuksak maromni taʼminlashga xizmat qilayapti.
5-gidrometallurgiya zavodini yetarli miqdorda oksidli ruda bilan taʼminlash maqsadida “Turboy konini o‘zlashtirishning qazib chiqarish va qayta ishlash quvvatlarini kengaytirish” investitsiyaviy loyihasini ro‘yobga chiqarish yuzasidan ishlar boshlandi. Kon va loyihalash tashkilotlari mutaxassislarining saʼyharakatlari bilan loyihaning texnik hujjatlarini ishlab chiqish va ishga tushirish rejalashtirilgan muddatda bajarilmoqda. Texnik iqtisodiy asoslarga muvofiq “Turboy” koni yaqinida sanoat maydoni, maʼmuriy-maishiy majmua, oshxona, avtogaraj, portlatgich materiallari ombori, yong‘in xavfsizligini taʼminlash deposi, vaxta usulida ishlaydigan 230 nafar ishchi-xizmatchilar istiqomat qiluvchi shaharcha, rudani 5-gidrometallurgiya zavodiga, shuningdek tovar-moddiy boyliklarni tashish uchun temir yo‘l quriladi. Loyihani amalga oshirish “Turboy” konida 900 dan ortiq yangi ish o‘rinlarini yaratish imkonini beradi. Kon karyerlari korxona boshqarmasidan 4 kilometrdan 100 kilometrgacha uzoqlikdagi hududda joylashgan.
“Auminzo-Amantoy” koni ishchi-xizmatchilari, muhandis-texnik xodimlari fidokorona mehnatlari tufayli yuksak marralarga erishmoqdalar. Konda joriy yilning dastlabki ikki oyida 8 mln kub metr yoki 20 mln tonna kon massasi qazib chiqarildi. 663,5 ming tonna ruda qazib olinib, bu boradagi reja 130 foizdan oshirib bajarildi.
Hozirgi kunda oshxona, futbol maydoni, savdo shoxobchasi va boshqa qulayliklar muhayyo etilgan Ishchilar shaharchasida “Auminzo-Amantoy” koni, 5-gidrometallurgiya zavodi, Avtomobil transporti boshqarmasining mazkur sanoat hududidagi avtojamlanmasining ikki ming nafardan ortiq ishchi-xizmatchilari istiqomat qilishayapti. Shaharcha hududi obod va ko‘kalamzorlashtirilgan maskanga aylantirilgan. Yotoqxonalar oralig‘idagi maydonchalarda o‘tqazilgan manzarali daraxt ko‘chatlari va gullarga nomi va tartib raqami yozilgan taxtacha birkitilgan.
2021-yilda hashar yo‘li bilan Ishchilar shaharchasi hududida issiqxona qurib bitkazilgani va bu issiqxonada yotoqxona xodimlari tomonidan limon, mandarin, apelsin ko‘chatlari va turli gullar parvarishlanayotganligi har qancha tahsinga munosibdir. O‘tgan yili yotoqxonalar hududida 11 mingtadan ko‘proq manzarali va mevali daraxt ko‘chatlari, gullar o‘tqazildi. Bu yilgi bahor mavsumida kon hududi, maʼmuriy bino, ishlab chiqarish obyektlari, yo‘laklar atroflarida 800 ta qayrag‘och, tut, jiyda, yasen va boshqa daraxtlar o‘tqazilib, 1 gektar yerda yashil maydon yaratildi.