“Eng yaxshi ratsionalizatorlik taklifi” tanlovi g‘oliblari taqdirlandi
Yaratildi: 22.04.2022
Yangilandi: 06.09.2022
O'qildi: 3076
“Eng yaxshi ratsionalizatorlik taklifi” tanlovi g‘oliblari taqdirlandi
Joriy yilning 22-aprel kuni Navoiy shahridagi “NKMK tarixi” muzeyida “Navoiy kon-metallurgiya kombinati” aksiyadorlik jamiyati yosh ishchi-xodimlari o‘rtasida 2021-yilda o‘tkazilgan “Eng yaxshi ratsionalizatorlik taklifi” tanlovi g‘oliblarini taqdirlash marosimi o‘tkazildi.
Tadbirda “NKMK” AJ Innovatsion rivojlanish bo‘yicha direktori K.Dadabayev, Kasaba uyushmalari Kengashi raisi o'rinbosari O.Temirov, Yoshlar yetakchilari Kengashi raisi S.Rajabovlar so‘zga chiqib, tanlov g‘oliblarini samimiy tabriklashdi hamda kombinat tomonidan mazkur yo‘nalishda olib borilayotgan ishlar va kelajakdagi rejalar haqida o‘zlarining fikr-mulohazalarini bildirishdi.
“Eng yaxshi ratsionalizatorlik taklifi” tanlovi komissiyasiga 115 nafar ishtirokchidan 146 ta ratsionalizatorlik takliflari kelib tushdi. Tanlov komissiyasi tomonidan ular orasidan 8 ta yo‘nalish bo‘yicha eng munosib topilgan g‘oliblar aniqlandi.
Jumladan, quyidagilar eng yaxshi ratsionalizatorlik takliflari sohiblari, deb topildi:
- “Geologiya” yo‘nalishi bo‘yicha Markaziy kon boshqarmasi “Muruntov” koni Gamma-aktivlashtirilgan tahlil markaziy laboratoriyasi boshlig‘i Alisher Qo‘ldoshov;
- “Konchilik” yo‘nalishi bo‘yicha Markaziy kon boshqarmasi “Auminzo-Amantoy” koni bosh muhandisining konchilik ishlari bo‘yicha o‘rinbosari Azizjon Najmiddinov va Shimoliy kon boshqarmasi bosh muhandisining konchilik ishlari bo‘yicha o‘rinbosari Nuriddin Kamolov;
- “Oltin ajratib olish texnologiyasi” yo‘nalishi bo‘yicha “1-GMZ” kon boshqarmasi 1-texnologik sexi boshlig‘i o‘rinbosari Boburjon Hakimov;
- “Mexanika” yo‘nalishi bo‘yicha Navoiy mashinasozlik zavodi Innovatsion texnologiyalar bo‘limi muhandis-konstruktori Dilshot Yusupov;
- “Energetika” yo‘nalishi bo‘yicha “1-GMZ” kon boshqarmasi Elektrouchastkasining katta ustasi Azimjon Po‘latov;
- “Transport” yo‘nalishi bo‘yicha Markaziy kon boshqarmasi 9-avtokorxonasi Avtomobillarning gaz ballon jihozlari tizimini sinash laboratoriyasi boshlig‘i Zavqiddin Ziyotov;
- “Ishlab chiqarishni avtomatlashtirish” yo‘nalishi bo‘yicha “1-GMZ” kon boshqarmasi Nazorat-o‘lchov asboblari va avtomatika uchastkasi chilangari Alisher Avezov va Shimoliy kon boshqarmasi Nazorat-o‘lchov asboblari va avtomatika markaziy laboratoriyasi muhandisi Azamat Isamov;
- “Axborot-kommunikatsion texnologiyalar” yo‘nalishi bo‘yicha Shimoliy kon boshqarmasi Axborot-kommunikatsion texnologiyalar markazi muhandis-dasturchisi Zuhriddin Mustafoyev.
Tanlov g‘oliblari diplom va pul mukofotlari bilan taqdirlandi.