Fransiya kompaniyasining rahbariyati bilan uchrashuv bo‘lib o‘tdi
Yaratildi: 15.07.2022
Yangilandi: 15.07.2022
O'qildi: 2834
Fransiya kompaniyasining rahbariyati bilan uchrashuv bo‘lib o‘tdi
2022-yilning 13-iyul kuni “Navoiy kon-metallurgiya kombinati” aksiyadorlik jamiyati boshqarmasida Fransiyaning “Dassault Systemes” kompaniyasining MDH mamlakatlaridagi rahbariyati va ularning O‘zbekiston Respublikasidagi hamkori bo‘lgan “Smartgeo” kompaniyasi vakillari bilan uchrashuv bo‘lib o‘tdi.
“NKMK” AJning axborot texnologiyalari, geologiya va konchilik bo‘limlari, loyihalash xizmatlari mutaxassislari, marksheyder, mexaniklari bilan uchrashuvda xorijiy kompaniyalar vakillari kon-geologiya sohasidagi zamonaviy dasturiy mahsulotlar, konchilik sanoatida jarayonlar va maʼlumotlarni boshqarish, tog‘-kon ishlarini tezkor rejalashtirish haqida so‘zlab berishdi.
Taʼkidlash kerakki, Fransiyaning “Dassault Systemes SE” kompaniyasining bosh qarorgohi Velizi-Villakuble shahrida joylashgan bo‘lib, mazkur kompaniya tomonidan 3D-dizayn, raqamli maketlarni yaratish va mahsulotning hayotiy siklini boshqarish uchun dasturiy taʼminotni ishlab chiqiladi.