Mamlakatimizda raqamli iqtisodiyotni rivojlantirish, barcha tarmoqlar va sohalarda zamonaviy axborot-kommunikatsiya texnologiyalarini keng joriy etish maqsadida “Raqamli O‘zbekiston – 2030” strategiyasi izchil amalga oshirilmoqda. Xususan, konchilik sanoatida bu borada joriy etilgan texnologiyalar muntazam takomillashib, global integratsiya jarayonlarida o‘z raqobatbardoshligini taʼminlayotgani bor gap.

“Navoiy kon-metallargiya kombinati” aksiyadorlik jamiyatida investitsion loyihalarni amalga oshirishda geologik-qidiruv ishlaridan tortib, tayyor mahsulotlarni olishgacha bo‘lgan barcha jarayon to‘liq raqamlashtirilgan. Bu kabi amaliy natijalar samarasi esa yirik korxonada mahsulot ishlab chiqarish hajmi ortishining asosiy omillaridan biri bo‘layapti. Raqamli texnologiyalarni joriy etish borasidagi loyihalar bilan yaqindan tanishish maqsadida shu yilning 13-oktabr kuni O‘zbekiston Respublikasi Axborot texnologiyalari va kommunikatsiyalarini rivojlantirish vaziri Sherzod Shermatov boshchiligidagi delegatsiya kombinatga tashrif buyurdi.

Dastavval, kombinat boshqarmasida delegatsiya aʼzolari ishtirokida korxonada ishlab chiqarishni raqamlashtirish bo‘yicha amalga oshirilayotgan ishlar taqdimoti bo‘lib o‘tdi. Taqdimotda kombinatning masʼul rahbar va mutaxassislari sohada olib borilayotgan ishlar haqida batafsil maʼlumot berdilar.

Kombinat mutaxassislari tomonidan 200 ga yaqin ishlab chiqarish va boshqarish vazifalarini bajaradigan 20 dan ortiq axborot tizimlari ishlab chiqilgan. Bular asosan transport boshqaruvi, ishlab chiqarish, moliya, kadrlar, moddiy-texnika taʼminoti, korxonaning energiya resurslarini nazorat qilish, rejali taʼmirlashni boshqarish, buxgalteriya hisobi kabi yo‘nalishlardadir.

Mehmonlar kunning ikkinchi yarimida Shimoliy kon boshqarmasining “Dovgiztov” koni, Markaziy kon boshqarmasining 2, 5-gidrometallurgiya zavodlari, Avtomobil transporti boshqarmasi, “Muruntov” konida bo‘lib, ularda raqamli texnologiyalarning qo‘llanilishi va ishlab chiqarishni avtomatlashtirish tizimlari bilan yaqindan tanishdilar.

– Raqamli iqtisodiyot davlatning iqtisodiy rivojlanishi, korxonalar ishlab chiqarilishida sarf-xarajatlar tejamkorligida yaxshi samaralarga erishishda muhim omil bo‘lib xizmat qilishi tabiiy. Shunday sharoitda Navoiy kon-metallurgiya kombinatida ilg‘or axborot texnologiyalarni keng qo‘llanilayotganligi, qo‘llanganda ham shunchaki emas, balki har bir jarayonda ilm-fan va ishlab chiqarish uyg‘unlashgani muvaffaqiyatlarga erishishda asos bo‘layapti, deb o‘ylayman, – dedi Axborot texnologiyalari va kommunikatsiyalarini rivojlantirish vazirligining Raqamli iqtisodiyot boshqarmasi mutaxassisi Ilhom Xo‘jaqulov.

Ishlab chiqarishga zamonaviy axborot-kommunikatsiya texnologiyalarini joriy etish, avtomatlashtirish jarayonlarining uzluksizligi va barqarorligini taʼminlash iqtisodiy foyda keltirmoqda. Eng muhim jihati shundaki, bunday salmoqli natijalarga mahalliy kadrlarning bilimi va mehnati bilan erishilmoqda.

“NKMK” AJ Matbuot xizmati.