“Navoiy kon-metallurgiya kombinati” aksiyadorlik jamiyatida qayta tiklanadigan quvvat manbalaridan olinadigan elektr energiyasi hajmi yildan-yilga ortib bormoqda. “Yashil energetika” texnologiyalari kombinat uchun muhim ahamiyat kasb etib, korxonalarda amaldagi energiya manbalariga qo‘shimcha quvvat ishlab chiqarishni taʼminlaydi.

Bugungi kunda kombinatda jami 250 kilovatt energiya quvvatini beruvchi quyosh fotoelektr stansiyalaridan foydalanib kelinmoqda. Joriy yilda talab etiladigan elektr energiyasini quyosh energiyasi manbalaridan qoplash bo‘yicha quvvati 1 200 kilovatt elektr energiyasi ishlab chiqarish imkoniyatini beruvchi to‘rtta loyiha amalga oshirilishi rejalashtirilgan.

Xususan, shunday loyihalarning dastlabkisi yaqinda “NKMK” AJ boshqarmasida ishga tushirildi. Quvvati 100 kilovatt bo‘lgan quyosh fotoelektr stansiyasi yiliga 170 ming kilovatt elektr energiyasi ishlab chiqarish imkonini beradi.

Navoiy kon-metallurgiya kombinati faoliyatida qayta tiklanadigan quvvat manbalaridan foydalanish bo‘yicha olib borilayotgan keng ko‘lamli ishlar korxonada energiyani ko‘p talab qiluvchi tarmoqlarni modernizatsiya qilish va energiya samaradorligini oshirish muhim ahamiyat kasb etishining isbotidir.

“NKMK” AJ Matbuot xizmati.