Bugungi kunda Navoiy mashinasozlik zavodida 15 ming turdagi mahalliylashtirilgan va import o‘rnini bosuvchi mahsulotlar ishlab chiqarilmoqda. Bu jarayonda zavodning Qo‘ymachilik sexida olib borilayotgan ishlar muhim ahamiyat kasb etadi. So‘nggi yillarda Navoiy kon-metallurgiya kombinati bo‘linmalarida foydalaniladigan sharli tegirmonlar va kon-shaxta uskunalari uchun Quymachilik sexida quyma mahsulotlari ishlab chiqarish hajmini oshirish maqsadida keng qo‘lamli amaliy ishlar amalga oshirildi.

Jumladan, 21-fevral kuni mazkur sexda 25 tonnalik yangi zamonaviy pech ishga tushirildi. Eng muhimi, ushbu pech uchun zarur qoliplash uskunasi bevosita zavodda tayyorlanadi. 3 mln dollar evaziga qurilib foydalanishga topshirilgan yangi pech Quymachilik sexi ishlab chiqarish quvvatini 30 foizga oshiradi yoki yiliga 40 ming tonnaga yetkazish imkonini beradi. Muhimi, pechning ishga tushirilishi bilan 53 ta ish o‘rinlari yaratildi.

Ishga tushirilgan pech zamonaviy texnologiyalarga asoslangan asbob-uskunalar bilan jihozlantirilganligi tufayli metall eritish sifati yaxshilanadi. Katta hajmdagi va og‘ir tegirmonlar, tog‘-kon texnikalari uchun ehtiyot qismlar bir marta quyilishi natijasida ish umumdorligi oshadi. Yangi pechda texnologik jarayon avtomatlashtirilgan bo‘lib, metall eritishni to‘liq kuzatib borish imkoni yaratildi.

Yangi pechni ishga tushirishga bag‘ishlangan tadbirda “NKMK” AJ rahbariyati va mehnat faxriylari ishtirok etdi.

“NKMK” AJ Matbuot xizmati.