Navoiy kon-metallurgiya kombinatida ishchi-xodimlarning ijod namunalarini nashr etishdek yaxshi anʼana yo‘lga qo‘yilgan. Chunki ular nafaqat ishlab chiqarish, balki ijod sohasida ham faol.

Yaqinda O‘zbekiston Yozuvchilar uyushmasi bilan hamkorlikda sheʼrlar, hikoyalar, ocherklar, publitsistik maqolalardan iborat “Zomin ilhomlari” to‘plami nashr etildi. Bu to‘plam 2020-yilda chop etilgan “Kengliklar sururi” to‘plamining mantiqiy davomidir.

Davlatimiz rahbari tashabbusi Jizzax viloyati Zomin tumanida barpo etilgan “NKMK” sanatoriysida konchilar bilan bir qatorida yozuvchi va shoirlarimiz uchun nafaqat dam olish yoki sog‘lomlashtirish maskani, balki haqiqiy ijod manbai bo‘lib ham xizmat qilayapti. Dam olish maskanida yozuvchi va shoirlarning kombinat bo‘linmalarida mehnat qilayotgan ishchi-xizmatchilar, mutaxassislar bilan ijodiy muloqotlari, madaniy tadbirlari va mushoiralari muntazam o‘tkazilmoqda. Mazkur to‘plam ham ana shu mushoiralar davomida bildirilgan takliflar asosida tayyorlandi.

“Zomin ilhomlari” to‘plamidan xalqimizning sevimli shoirlari Abdulla Oripov, Muhammad Yusuf, Halima Xudoyberdiyeva, Sirojiddin Sayyid, Iqbol Mirzo, Saʼdulla Hakim, G‘ayrat Majid, Farmon Toshev, Isajon Sulton, Xosiyat Rustamovalar bilan bir qatorda, 60 nafarga yaqin Toshkent shahri va viloyatlarda yashab, ijod qilayotgan taniqli yozuvchi-shoirlar, 50 nafardan ortiq “NKMK” AJ, “Navoiyuran” DK va “NKMK jamg‘armasi” DMda mehnat qilayotgan turli kasb egalari, 30 nafardan ziyod viloyat ijodkorlari hamda Navoiy davlat konchilik va texnologiyalar universiteti o‘qituvchi-talabalarining eng sara ijod namunalari joy olgan. Quvonarli jihati, to‘plamga kiritilgan sheʼr va maqolalarning aksariyati ijodkorlarimiz tomonidan “NKMK” sanatoriysida dam olish davrida yaratilgan.

Bunday kitoblarning chop etilishi ishdan bo‘sh vaqtlari qalblaridagi his-tuyg‘ular, kechinmalari ifodalangan sheʼrlar, adabiy-badiiy asarlar yaratayotgan ijodkorlarni qo‘llab-quvvatlashga xizmat qiladi.

“NKMK” AJ Matbuot xizmati.