O‘zbekiston Respublikasi Oliy Majlisi Senati raisi Tanzila Narbayeva Navoiy viloyatiga tashrifi doirasida 12-aprel kuni “Navoiy kon-metallurgiya kombinati” aksiyadorlik jamiyatida bo‘ldi.

“NKMK” AJ boshqarmasida o‘tkazilgan uchrashuvda Oliy Majlis Senati raisi Tanzila Narbayeva, kombinat rahbariyati va xodimlari hamda videokonferens aloqa orqali korxona bo‘linmalarida tashkil etilgan studiyalarda 2,5 ming nafarga yaqin ishchi-xodimlar ishtirok etishdi.

Uchrashuvda “O‘zbekiston Respublikasi Konstitutsiyasi to‘g‘risida”gi Konstitutsiyaviy qonun loyihasining mazmun-mohiyatini tushuntirishga alohida eʼtibor qaratildi.

Tadbirda Oliy Majlis Senati raisi T.Narbayeva so‘zga chiqib, Navoiy kon-metallurgiya kombinatining ulkan iqtisodiy salohiyati, korxona O‘zbekiston iqtisodiyotini rivojlantirishga qo‘shayotgan salmoqli hissasini taʼkidlab, keyingi yillarda mamlakatimizda amalga oshirilayotgan keng qo‘lamli islohotlar, ayniqsa, inson qadrini ulug‘lash bo‘yicha olib borilgan ishlarning natijalari to‘g‘risida aniq misollarni keltirib o‘tdi.

Shuningdek, parlament yuqori palatasi raisi T.Narbayeva yangi tahrirdagi Konstitutsiya xalq Konstitutsiyasi ekanligini, muhokamalarda bildirilgan takliflar so‘zsiz inobatga olinganligini, Konstitutsiyada yoshlar, xotin-qizlar masalalari yuzasidan alohida normalar soni oshirilgani, ayniqsa, Bosh qomusimizga zamon talabiga mos normalar kiritilgani, so‘nggi yillarda respublikamizda amalga oshirilgan ochiqlik, majburiy mehnatga barham berish yangi Konstitutsiyada mustahkamlab qo‘yilganligini aytib o‘tdi.

Tadbirda bir guruh kombinat xodimlari, jumladan Markaziy kon boshqarmasi yoshlar yetakchisi S.Boboyorova, 7-gidrometallurgiya zavodi bosh muhandisi J.Abdullayev, Shimoliy kon boshqarmasi xodimi A.Uzaxbayeva, 3-gidrometallurgiya zavodi direktori Sh.Narbadalov, 4-gidrometallurgiya zavodi direktori A.Zokirov, Zarafshon qurilish boshqarmasi xodimi M.Preobrajenskaya, “1-GMZ” kon boshqarmasi yoshlar yetakchisi S.Rahmonov, Jamoatchilik bilan aloqalar bo‘yicha direktor X.Raupovlar Konstitutsiyaviy qonun loyihasi yuzasidan o‘z fikr-mulohazalarini bildirib, joriy yilning 30-aprel kuni bo‘lib o‘tadigan referendumda faol ishtirok etishlarini taʼkidladilar.

Uchrashuvdan so‘ng Oliy Majlis Senati raisi T.Narbayeva Navoiy shahridagi “Farhod” madaniyat saroyi va “NKMK tarixi” muzeyida ham bo‘lib, noyob tabiiy qazilmalarga boy Qizilqum zamini hamda Navoiy kon-metallurgiya kombinatining tarixi va buguni haqida so‘zlaydigan eksponatlar, tarixiy artefaktlar bilan yaqindan tanishdi.

“NKMK” AJ Matbuot xizmati.