“Navoiy kon-metallurgiya kombinati” AJda muhim investitsion loyihalar bosqichma-bosqich amalga oshirilmoqda. Xususan, Tomdi tumani hududidagi “Turbay” konini o‘zlashtirish uchun qazib olish va qayta ishlash quvvatlarni kengaytirishga qaratilgan loyihani ro‘yobga chiqarish ishlari 2022-yilda boshlandi.

Mazkur loyiha doirasida “Turbay” konidan yiliga 2 mln tonna oksidli oltin tarkibli maʼdan qazib olish rejalashtirilgan. Konni o‘zlashtirish natijasida kelajakda uning uzunligi qariyb 1,5 kilometr, eni 900 metr va chuqurligi 170 metrni tashkil qiladi.

Bugungi kunda “Turbay” konida maʼdan qazib olish ishlarida ekskavatorlar, avtoag‘dargichlar, burg‘ilash uskunalari, buldozerlar, frontal yuklagichlar kabi zamonaviy konchilik texnikalaridan keng foydalanilmoqda. Kondan qazib chiqarilgan maʼdan temir yo‘l orqali 5-gidrometallurgiya zavodiga qayta ishlash uchun tashib keltirilmoqda.

Joriy yilda loyiha doirasida “Turbay” konini 5-gidrometallurgiya zavodi bilan bog‘lovchi 50 kilometrlik temir yo‘l liniyasi hamda kon hududida vaxta usulida ishlaydigan ishchilar uchun 100 o‘ringa mo‘ljallangan yotoqxona va oshxonani foydalanishga topshirish rejalashtirilgan.

Xulosa o‘rnida aytish kerakki, mazkur loyihaning to‘liq amalga oshirilishi bilan kombinatda qimmatbaho metal ishlab chiqarishni ko‘paytirishda mustahkam poydevor yaratiladi.

“NKMK” AJ Matbuot xizmati.