Navoiy mashinasozlik zavodi nafaqat Navoiy kon-metallurgiya kombinati, balki respublikamizning eng yirik sanoat korxonalaridan biridir. Bugungi kunda zavodda 15 ming turdagi mahalliylashtirilgan va import o‘rnini bosuvchi mahsulotlar, shu jumladan, turli hil uskunalar, nostandart jihozlar, dastgohlar, ehtiyot qismlar ishlab chiqarilmoqda.

Zavodning Quymachilik sexida olib borilayotgan ishlar muhim ahamiyat kasb etadi. So‘nggi yillarda sexda kombinat bo‘linmalarida foydalaniladigan sharli tegirmonlar va kon-shaxta uskunalari uchun quyma mahsulotlari ishlab chiqarish hajmini oshirish maqsadida keng ko‘lamli ishlar amalga oshirilmoqda. Xususan, joriy yilning fevral oyida mazkur sexda 25 tonnalik yangi zamonaviy pech ishga tushirilgan edi. Ushbu pech uchun zarur qoliplash uskunasi bevosita zavodda tayyorlandi. Yangi pech sex ishlab chiqarish quvvatini 30 foizga oshiradi yoki yiliga 40 ming tonnaga yetkazish imkonini beradi. Pechning ishga tushirilishi bilan 53 ta ish o‘rinlari yaratildi.

Sexning ishlab chiqarish quvvatlarini oshirish ishlari davom ettirilayapti. Rangli quyma uchastkada amaldagi 6 tonnalik metall eritish pechi texnologik jarayonlarni raqamlashtirish evaziga modernizatsiya qilindi. 11-may kuni modernizatsiya qilingan pech ishga tushirildi. Endilikda ushbu pech yordamida po‘lat va cho‘yandan kichik hamda o‘rta o‘lchamdagi quymalarni ishlab chiqarish hajmi oshadi. Ushbu loyihaning tatbiq etilishi qo‘shimcha 18 ta ish o‘rnini yaratish imkonini berdi.

Mazkur pech zamonaviy texnologiyalarga asoslangan asbob-uskunalar bilan jihozlantirilganligi tufayli metall eritish sifati yaxshilanadi. Pechda texnologik jarayon avtomatlashtirilgan bo‘lib, metall eritish to‘liq kuzatib boriladi.

Pechni ishga tushirishga bag‘ishlangan tadbirda “NKMK” AJ rahbariyati, korxona ishchi-xodimlari va mehnat faxriylari ishtirok etdi.

“NKMK” AJ Matbuot xizmati.