“NKMK” AJ boshqarmasida “Navoiy kon-metallurgiya kombinati” aksiyadorlik jamiyati mehnat jamoasining konferensiyasi bo‘lib o‘tdi. Konferensiyada amaldagi Jamoa shartnomasining 2022-yilda bajarilishi hamda Jamoa shartnomasiga 2023-yilning 30-aprelida kuchga kirgan O‘zbekiston Respublikasi Mehnat kodeksi talablaridan kelib chiqib, o‘zgartirish va qo‘shimchalar kiritish va boshqa masalalar muhokama qilindi.

Kombinatda Jamoa shartnomasining o‘tgan yilda bajarilish yakunlari to‘g‘risida “NKMK” AJ Boshqaruvi raisi – Bosh direktori Q.Sanaqulov hamda NKMK xodimlari kasaba uyushmasi Kengashi raisi I.Rahmatovlarning hisobotlari tinglandi. Maʼruzalarda amaldagi Jamoa shartnomasi belgilangan majburiyatlarning bajarilish holati, ijtimoiy, iqtisodiy sohada olib borilgan ishlar, qo‘lga kiritilgan natijalar va rejalar haqida so‘z yuritildi.

260520233

Konferensiyada Jamoa shartnomasining 2022-yilda bajarilishini ikki tomonlama tekshirish dalolatnomasi, amaldagi Jamoa shartnomasiga o‘zgartirish va qo‘shimchalar kiritish bo‘yicha markaziy komissiya bayonnomalari to‘g‘risida bosh direktorning xodimlar va maʼmuriy masalalar bo‘yicha o‘rinbosari Q.Taparov, 2022-yilda kombinatda mehnat muhofazasi va xavfsizlik texnikasi, ishlab chiqarishda baxtsiz hodisalar holati bo‘yicha maʼlumot va 2023-yil uchun mehnat muhofazasi kelishuvini qabul qilish to‘g‘risida Mehnat muhofazasi, sanoat xavfsizligi va ekologiya bo‘yicha direktor A.Cherdansevning axborotlari eshitildi.

Tadbirda Mehnat kodeksiga muvofiq “NKMK” AJning amaldagi Jamoa shartnomasiga qator o‘zgartirish va qo‘shimchalar kiritish masalasi ham ko‘rib chiqildi.

260520237

Yakuniy qarorga ko‘ra, konferensiya delegatlari tomonidan kombinat maʼmuriyati va kasaba uyushma Kengashining 2022-yilda Jamoa shartnomasining bajarilishi bo‘yicha faoliyati qoniqarli, deb topildi hamda amaldagi Jamoa shartnomasiga kiritilgan o‘zgartirish va qo‘shimchalar qo‘llab-quvvatlandi.

“NKMK” AJ matbuot xizmati.