Mamlakatimizda “Yoshlar oyligi” “Yangi O‘zbekiston yoshlari, birlashaylik!” shiori ostida qizg‘in o‘tmoqda. Oylik dunyoda oltin ishlab chiqarish bo‘yicha yetakchi kompaniyalardan biri bo‘lgan “Navoiy kon-metallurgiya kombinati” aksiyadorlik jamiyati yoshlari uchun ham unutilmas, quvonchli voqealarga boy bo‘lmoqda.

Bugungi kunda “Navoiy kon-metallurgiya kombinati” aksiyadorlik jamiyati ishchi-xodimlarining 30 foizi yoki 13,5 ming nafarini 30 yoshgacha bo‘lgan yoshlar tashkil etadi. Ularning 3,1 ming nafari oliy maʼlumotga ega bo‘lib, 350 nafardan ortig‘i rahbarlik lavozimlarida, 700 nafardan ko‘prog‘i turli kasblarda mutaxassislar bo‘lib faoliyat ko‘rsatishyapti. Bu, hech shubhasiz, korxonada yoshlar katta kuch ekanligini, kombinat kelajagi uchun munosib avlod yetishib kelayotganini ko‘rsatib turibdi. Darvoqe, korxonada erishilayotgan yutuqlarda yoshlarning ham munosib hissasi bor.

Muhtaram Prezidentimiz Shavkat Mirziyoyev rahnamoligida mamlakatimiz yoshlari o‘z isteʼdodlarini ro‘yobga chiqarishlari uchun keng imkoniyatlar yaratilmoqda. Cheksiz eʼtibordan behad ruhlangan va bahramand bo‘layotgan yoshlarimiz yuz-ko‘zlarida g‘ayratshijoat, tashabbuskorlik, bilimga chanqoqlik va jonajon Vataniga daxldorlik hissi namoyon bo‘lyapti.

Kombinatda yoshlarga oid davlat siyosatini amalga oshirish hamda ularni moddiy va maʼnaviy jihatdan qo‘llab-quvvatlash maqsadida alohida chora-tadbirlar Dasturi tasdiqlangan bo‘lib, uning ijrosini taʼminlash uchun 9 milliard so‘m ajratildi. Jumladan, bu mablag‘lar yoshlarni bo‘sh vaqtining mazmunli tashkil etish, iqtidorli yoshlarni tashabbuslarining rag‘batlantirish, ijtimoiy faolligini oshirish, jamiyatda o‘zining munosib o‘rnini topishiga ko‘maklashish, zarur shart-sharoit va infratuzilmalar yaratish hamda boshlang‘ich tashkilot yetakchilari faoliyati samaradorligini oshirish uchun sarflanyapti.

Kombinat rahbariyati tomonidan yoshlarni qo‘llabquvvatlash, ularning isteʼdodini ro‘yobga chiqarish, yosh mutaxassislarni tarbiyalash borasida o‘ziga xos maktab yaratilgan. Har yili yoshlarimiz o‘rtasida “Yilning eng yosh mutaxassisi”, “Yilning eng yosh kasb egasi”, “Yilning eng yaxshi ratsionalizatorlik taklifi”, “Yilning eng yaxshi yoshlar yetakchisi” kabi tanlovlar o‘tkazilib kelinmoqda. Tanlov g‘oliblari tantanali tarzda rag‘batlantirilmoqda.

Yurtboshimizning topshiriqlariga muvofiq Respublikamizning minglab iqtidorli va isteʼdodli yoshlar uchun shart-sharoit yaratish maqsadida, kombinat tomonidan Qiziltepa tumani “To‘dako‘l” dam olish bazasi hududida Xalqaro shaxmat maktabini hamda Zarafshon shahrida ixtisoslashgan maktab-internati qurilishi yakunlanmoqda. Yaqin kunlarda yoshlarning har tomonlama barkamol insonlar bo‘lib yetishishlariga xizmat qiladigan mazkur obyektlar foydalanishga topshiriladi.

Iyun – yoshlar hayotidagi quvonchli, orziqib kutiladigan oydir. Mana oltinchi yildirki, bu oyni – “Yoshlar oyligi” sifatida keng nishonlab kelyapmiz. Bu yil ham ushbu oyni o‘zgacha taraddud bilan kutib oldik. Oylikni o‘ziga xos , yoshlarimiz xotirasida muhrlanib qoladigan darajada tashkil etish uchun rang-barang dasturlar ishlab chiqildi.

“Yangi O‘zbekiston yoshlari, birlashaylik!” shiori ostida kombinat bo‘linmalarida “Rahbar va yoshlar”, “Motivatsiya soati” loyihasi doirasida Davlat mukofoti sohiblari, ishlab chiqarish va ijtimoiy faoliyatda muvaffaqiyatga erishgan yosh rahbarlar bilan uchrashuvlar o‘tkazilib kelinmoqda.

Yil boshidan buyon tashkil etilgan “Zakovat” intellektual o‘yini, “Kibersport”, mini-futbol bo‘yicha “NKMK kubogi” turnirlarining final o‘yinlari o‘tkazilib, g‘oliblar aniqlandi. Yoshlarimizning ijtimoiy faolligi olib borayotganligini alohida taʼkidlab o‘tish joiz. 5-iyun – “Butunjahon atrof-muhitni muhofaza qilish kuni”, 14-iyun – “Xalqaro donorlar kuni” munosabati bilan kombinatning ko‘ngilli yoshlari o‘zlari yashab turgan hududlar, masjid va ziyoratgoh qadamjolarni obodonlashtirish, Shaxmat maktabida tozalash ishlarini, Navoiy, Zarafshon, Nurobod shaharlari Qon quyish markazlarida donorlik aksiyalarini o‘tkazishdi.

26-27-iyun kunlari Navoiy shahridagi “Farhod” madaniyat saroyida o‘tkazilishi anʼanaga aylangan “Quvnoqlar va zukkolar” ko‘rik-tanlovi, “DJ Fest” dijeylar chiqishlari, “Robotlar jangi” musobaqalari viloyatimiz markaziga shahar va tumanlardan tashrif buyurgan yoshlar uchun unutilmas onlarni baxshida etdi, desam mubolag‘a bo‘lmaydi.

“Yoshlar oyligi” dasturi doirasidagi tadbirlarni o‘tkazish hamda yil boshidan buyon faol bo‘lgan boshlang‘ich tashkilot yetakchilari va yoshlarning nomlarini alohida taʼkidlash joiz. Ular o‘z mehnatlari, g‘oyalari, isteʼdodi va ijodlari bilan nafaqat yoshlar, balki kombinatimiz jamoasi o‘rtasida hurmat qozonib kelishyapti. Saodat Boboyorova, Sardor Rahmonov, Feruz Gafurov, Timur Qalandarov, Voxidjon Vafoyev, Sanjar Temirov, Jahongir Ro‘ziyev, Muhiddin Gadoyev, Farrux Ashurov, Abdullo G‘iyosov, Zamana Joxashova, Habibulla Omonov, Marufjon Mo‘munov, Nodirbek To‘yev, Umidjon Aripov, Farida Tangatarova, Dinara Kushmanova, Ayxan Chatayeva, Maqsud Ostonov, Zarifa Yarasheva, Xusniddin Bo‘riyev, Eldor Norchayev, G‘iyosjon Kenjayev, Farxod Norbekov, Javlonbek Eshboyev, Abdumalik Sharipov kabi olovqalb yoshlarimiz tashabbuskorlik bobida tengdoshlariga o‘rnak bo‘lib kelishyapti.

Muxtasar aytganda, yoshlarimiz qalbida ertangi kunga ishonch hissini mustahkamlash davr talabidir. Ana shu ezgu maqsad yo‘lida yoshlarni qo‘llab-quvvatlash, yangi marralarga ruhlantirish, muammolarini o‘z vaqtida hal etish asosiy vazifamiz bo‘lib kelgan, bundan keyin ham shunday bo‘lib qoladi. Buning uchun yoshlarimizning xohish-istagini to‘la anglab yetish va ularni ro‘yobga chiqarish doimiy eʼtiborimizda bo‘ladi. Fursatdan foydalanib, mamlakatimiz yoshlarini, tengdoshlarimizni 30 iyun – Yoshlar kuni munosabati bilan qizg‘in tabriklayman. Mustahkam sog‘lik-salomatlik, kelgusidagi ishlariga zafarlar tilayman.

Sanjar RAJABOV,

NKMK yoshlar yetakchilari Kengashi raisi.

Manba: “Konchilar hayoti” gazetasining 2023-yil 30-iyundagi 12-soni

https://www.ngmk.uz/uz/home/blog/press-tsentr/gazeta–konchilar-hayoti-