O‘zbekiston Respublikasi qurilish sohasi xodimlari kuniga

Qurilish tarmog‘i Navoiy kon-metallurgiya kombinatida rivojlanib borayotgan eng ilg‘or, yetakchi sohalardan biri hisoblanadi. Bugun ular qurayotgan inshootlar chinakam bunyodkorlik namunasi bo‘lib, yurt taraqqiyoti, kombinat ravnaqi, xalq farovonligiga xizmat qilmoqda. Ular orasida yurt qorako‘zlarining o‘z kuchi bilan iinvestitsion loyihalar asosida bunyod etilayotgani zamonaviy sanoat industriyasi, yaʼni, gidrometallurgiya zavodlari, kon va shaxtalar, temir yo‘llar, ko‘prik va yo‘llar, ijtimoiy soha obyektlari Yangi O‘zbekistonning yangi sahifasini yaratmoqda. Kombinatning keyingi yillardagi yutuqlarida soha xodimlarining hissasi katta bo‘ldi. Bayram arafasida “NKMK” AJ bosh direktorining investitsiyalar va kapital qurilish bo‘yicha o‘rinbosari Farhod Bahronov shular haqida so‘zlab berdi:

Quruvchilik – sharafli kasb! Uning yuki qanchalik zalvorli ekanini, ulkan masʼuliyat va mashaqqat talab etishini yaxshi bilamiz. Chunki, quruvchi bo‘lish yoki qurilish degani bu o‘z-o‘zidan bo‘lib qoladigan oson ish emas. Unda har bir qadam – loyihani mukammal ishlab chiqishdan tortib, tamal toshi qo‘yishgacha eʼtibor, mahorat, tajriba, fidokorona mehnat talab etadi. Bundan tashqari, sohamizda sifat va samaradorlik biz uchun birinchi o‘rinda turadi. Chunki, yo‘l qo‘yilgan oddiy bitta xato ham kelgusida katta muammolarni keltirib chiqarish mumkin. Shu bois, ishni pishiq-puxta amalga oshirish doimiy diqqat-eʼtiborimizda. Ayni paytda investitsion loyihalar asosida olib borayotgan qurilishlarimiz hazilakam ish emas. Barchasi yirik loyihalar hisoblanadi. Quruvchilarimiz buni chuqur his etib, ulkan loyihalarni tez va oz muddatda uddalayotgani va so‘nggi yillarda amalga oshirgan bunyodkorlik ishlari buning yaqqol isbotidir.

VVY_7363

Shu o‘rinda, o‘tgan tarixga yuzlansak! Yaqin o‘n yillargacha bu kabi loyihalar faqat chetdan ko‘mak asosida yillar davomida bajarilgan. Bugun esa bundan to‘la voz kechib, barchasini o‘zimizning quruvchilarimiz bajarayapti. Chunki bundan o‘n besh yil avval rahbariyat tomonidan biz, quruvchilar oldiga bundan keyin hoh katta, hoh kichik loyiha bo‘lsin, o‘z kuchimiz bilan o‘zimiz quramiz, degan bosh vazifa qo‘yilgan edi. Bu, bir tomondan biz uchun yuksak masʼuliyat, majburiyat va bildirilayotgan katta ishonch edi.

2010-yilda 4-gidrometallurgiya zavodi va 2011-yilda “Muruntov” konida jahonda yagona bo‘lgan tik-qiya konveyeri o‘z kuchimiz bilan dastlabki ishlarimizdan hisoblanadi. Mana shu ikkita ulkan loyihaning muvaffaqiyatli amalga oshirilishi o‘zimizga bo‘lgan ishonchni yana-da mustahkamladi. Undan keyin ham qanchadan-qancha qurilishlar amalga oshirilmadi, deysiz!

Shunga mos ishimiz mazmunini ham o‘zgartirdik. Birinchi galda “ish quroling soz bo‘lsa, mashaqqating oz bo‘lur”, degan naqlga amal qilib qurilish tashkilotlarimiz parki zamonaviy qurilish texnikalari hisobiga mustahkamlandi va hozirda 500 ga yaqin texnikalar mavjud. Bu imkoniyatlar ishimiz surʼatini yanada oshirishga xizmat qilmoqda.

Keyingi o‘n yillikdagi yana bir eʼtirofga arzirli ishimiz, bu – qurilish materiallarini korxonamizning o‘zida ishlab chiqarilayotganidir. Bu, birinchidan, obyektlar qurilishi xarajatlarini sezilarli pasaytirish, mablag‘ni iqtisod qilish, ikkinchidan, qurilish maydonlariga ehtiyojdagi materiallarni yetkazib berishda uzilishlar bo‘lmasligi, uchinchidan, yangi sexlar tashkil etilish hisobiga yoshlarimiz uchun ish o‘rinlari yaratishga imkon yaratdi.

Buning natijasida hozirda o‘zimizda 24 turdan ortiq qurilish mahsulotlari ishlab chiqarilmoqda. Jumladan, temir-beton, metall konstruksiyalar, g‘isht, qum, ohak, shag‘al, eshik-derazalar, polietilen quvurlar va boshqa mahsulotlar ishlab chiqarilayotgani korxonamizga katta foyda keltirmoqda. Keyingi yetti yilda 859,1 milliard so‘mlik ana shunday qurilish materiallari ishlab chiqarishga erishildi. Ayni paytda esa ehtiyojdagi mahsulotlar turini bosqichma-bosqich ko‘paytirib borish choralarini ko‘rayapmiz. Ishimiz hajmi, surʼati shunga mos yildan-yilga o‘sib borayapti. Misol uchun, 2022-yilda umumiy qiymati 486 million dollarlik ish bajargan bo‘lsak, holbuki, bu 2016-yilda atigi 189,6 million dollarni tashkil etgan.

Shuni alohida taʼkidlash joizki, kombinat hayotida katta qiymatga ega Investitsiya dasturi alohida o‘rin tutadi. 2017-2022-yillarda ushbu dastur asosida 28 ta investitsion loyihalarni amalga oshirganimiz, shu yillar davomida kombinat homiyligida o‘nlab ijtimoiy soha obyektlarini barpo etganimiz sohamiz rivojidagi ulkan qadam bo‘ldi va kombinat solnomasida yangi sahifa ochdi. Jumladan, 5, 6, 7-gidrometallurgiya zavodlari, 2-gidrometallurgiya zavodining “B” bloki, yangi ochilgan “Turbay”, “Balpantov” va “Tomdibuloq” konlarini gidrometallurgiya zavodlari bilan bog‘lovchi 82,6 kilometrlik temir yo‘l, Zomin tumanida “NKMK” sanatoriysi, Zarafshon shahrida favvoralar sayilgohi, Uchquduq tumanida “Oltinko‘l” dam olish majmuasi va boshqa obyektlar buning dalilidir. Bu kabi ishlarimiz kon-metallurgiya sohasida katta yangilik, bunyodkorlik yo‘lida esa ulkan qadam bo‘ldi. Yurt qorako‘zlari amalga oshirayotgan yuksak darajadagi bu ishlarni, o‘zgarishlar nafasini ko‘rib nafaqat yurtdoshlarimiz, balki kombinatga kelayotgan xorijlik mehmonlar ham ko‘pming kishilik jamoamiz ishiga, qurilish sohasidagi yutuqlarimizga tan bermoqda. Sohada ancha ilgarilab ketganimizni eʼtirof etmoqda. Bu, hech qanday balandparvoz gaplar emas, aksincha, aniq natija, amalda bor narsalar.

photo_2023-08-09_17-16-11

Misol uchun, 5-gidrometallurgiya zavodini olaylik! Uni yangi asrning haqiqiy bunyodkorlik namunasi, desak ham bo‘ladi. Zavodning zamonaviy qiyofasi, uning o‘ziga xos yechimlarini ko‘rib havasingiz keladi. Ulkan ishlar qisqa davrda, belgilangan muddatdan oldin bajarildi. Bu, shak-shubhasiz, cho‘l injiqlariga qaramay yelkama-yelka ishlagan quruvchilar, mutaxassisu muhandislarning matonatli mehnati, orttirgan tajribamiz mahsulidir. Eng asosiysi, so‘nggi yillarda barpo etgan har bir inshoot qurilishi soha uchun ulkan yangilik, katta tarixdir. Ular har biri haqida soatlab gapirsak, tom-tom asarlar yozsa arziydi.

Yoki har gal xizmat safariga borganda, Zarafshon shahri, Uchquduq tumani markazi, Zarkent qo‘rg‘oni va boshqa hududlarda hamkasblarimiz, ular oilasi, farzandlari, mahalliy aholi vakillari biz qurgan ijtimoiy soha obyektlari – favvoralar, madaniyat va istirohat bog‘lari, dam olish maskanlari, sanatoriylarda mazza qilib dam olayotgani, ular quvonchi va shukronaligini ko‘rib, shunday xayrli ishlarning boshida turgan kombinatdan mamnun ekanliklarini sezaman. Bu ham xalqimizni rozi qilish yo‘lidagi yutuqlarimizdan biridir.

Xalqimizda: “Yaxshi dam – mehnatga hamdam”, degan ajoyib naql bor. Nafaqat ishlab chiqarish surʼati oshirib borish, balki hamkasblarimiz, ular oilasi va farzandlarini ijtimoiy himoya qilish ham doimiy diqqat-eʼtiborimizda.

Bugungi kunda kombinatda Kapital qurilish boshqarmasi, Investitsiyalar boshqarmasi, kon boshqarmalarida qurilish bo‘limlari, Zarafshon qurilish boshqarmasi, uning tasarrufidagi 3 ta qurilish-montaj boshqarmasi hamda 1 ta qurilish tresti mavjud bo‘lib, ularda 3,5 ming nafardan ziyod quruvchi-muhandislar mehnat qilmoqda. Ular safida yuzlab yoshlar va xotin-qizlar vakillari ham fidokorona mehnat qilmoqda. Albatta, jamoamizda fidokorona mehnat mahsulini ko‘rish, bayramlarga munosib tuhfa hozirlash, ayyomlarni keng nishonlash anʼana tusiga kirgan. Ayni paytda quruvchilarimiz o‘zlarining sharafli kasb bayrami va O‘zbekiston Respublikasi davlat mustaqilligining 32 yilligini yorug‘ yuz, eʼtirofli yutuqlari bilan kutib olmoqda. Bugungi quvonchli kunlar arafasida hamkasblarimiz bilan birgalikda eng ulug‘, eng aziz bayramga munosib sovg‘a hozirladik. Jumladan, 6-gidrometalurgiya zavodi, “To‘dako‘l” dam olish bazasida xalqaro shaxmat maktabi, Zarafshon shahrida 504 o‘rinli ixtisoslashtirilgan maktab-internati foydalanishga topshirish uchun to‘liq shay holga keltirildi.

Har bir sohaning o‘z jonkuyarlari bo‘ladi. Bugun safimizda butun umrini sharafli kasbga bag‘ishlagan fidoiylar ko‘plab topiladi. Ular o‘z mehnati bilan kombinat rivojiga munosib hissa qo‘shib kelayaptiki, buni eʼtirof etmasdan ilojimiz yo‘q. Hamkasblarimiz fidokorona mehnati doimiy tarzda rag‘batini topib kelayapti. Keyingi yillarda Zarafshon qurilish boshqarmasi boshlig‘i A.Eshonqulov “O‘zbekiston Respublikasida xizmat ko‘rsatgan quruvchi” unvoni, Investitsiyalar boshqarmasi boshlig‘i N.Ro‘ziyev va mehnat faxriysi V.Kapanadzelar “Mehnat shuhrati” ordeni bilan taqdirlangani buning isboti va bu kombinat quruvchilarining fidokorona mehnatiga berilgan munosib bahodir.

Qurilish sohasida bundan keyin ham marrani katta olganmiz. Jumladan, Investitsiya dasturi doirasida qiymati 513,5 million dollar bo‘lgan 12 ta loyiha jadal suratlarda olib borilmoqda. Uning 155,8 million dollari qurilish-montaj ishlariga to‘g‘ri keladi. Shuningdek, hali oldimizda qiymati 390 million dollar bo‘lgan “Muruntov” konini o‘zlashtirish (V-navbati) 2-bosqichi va qiymati 55 million dollar bo‘lgan “Yangi Davon-Toshkon konlarida maʼdan qazib olish majmuasini qurish” kabi loyihalarni 2026 yilgacha amalga oshirishdek istiqboldagi ishlar turibdi. Bu, marralar bizga yana-da ko‘tarinki kayfiyat, kelgusi rejalar va vazifalarni sidqidildan bajarishga g‘ayrat bag‘ishlaydi.

Fursatdan foydalanib, qadrli hamkasblarimizni O‘zbekiston Respublikasi qurilish sohasi xodimlari kuni bilan tabriklayman.

“NKMK” AJ Matbuot xizmati.