18-oktabr kuni Navoiy shahrida “Navoiy kon-metallurgiya kombinati” AJ rahbariyati va mutaxassislari uchun ESG va barqaror rivojlanish mavzulariga bag‘ishlangan seminar o‘tkazildi.

Mazkur seminar ESG va barqaror rivojlanishning asosiy tamoyillari bilan tanishtirish hamda biznes uchun ekologik, ijtimoiy va iqtisodiy manfaatlarga erishishga eʼtibor qaratgan holda ushbu tamoyillarni korporativ muhitda qo‘llashning amaliy jihatlarini ochib berishga qaratildi.

2 (2)

Seminarda Boston Consulting Group (BCG) xalqaro konsalting kompaniyasi vakillari, iqlim o‘zgarishi, ESG strategiyasini ishlab chiqish va barqaror rivojlanish bo‘yicha mutaxassislar ishtirok etishdi.

Tadbirda taʼkidlanganidek, “NKMK” AJ faoliyatida ESG tamoyillarini joriy etish maqsadida tegishli “yo‘l xaritasi” tasdiqlandi. Ushbu “yo‘l xaritasi”da ESG tamoyillarini kompaniyaning biznes modeli va korporativ madaniyatiga integratsiyalashuvini taʼminlash bo‘yicha kombinat rahbariyati va mutaxassislari uchun o‘quv dasturlarini rivojlantirish belgilangan.

4 (1)

Seminar davomida barqaror rivojlanish sohasidagi global tendensiyalar va ularning konchilik sanoati kompaniyalariga taʼsiri, ESG strategiyasini ishlab chiqish va amalga oshirish bo‘yicha jahon tajribasi ko‘rib chiqildi. Shuningdek, “NKMK” AJda ESG amaliyotlarining joriy holati hamda ESG dasturlarini ishlab chiqish va joriy etish bo‘yicha “yo‘l xaritasi”ning chora-tadbirlariga bag‘ishlangan masalalar muhokama qilindi.

“NKMK” AJ Matbuot xizmati.