Navoiy kon-metallurgiya kombinati ijtimoiy masʼuliyatni zimmasiga olib, korxonada faoliyat olib borayotgan xotin-qizlarni qo‘llab-quvvatlash, isteʼdodli, tashabbuskor ayollar mahoratini rag‘batlantirishga qatta eʼtibor qaratadi.

Bahor va go‘zallik ayyomi bo‘lgan 8-mart – Xalqaro xotin-qizlar kuni bayrami kombinat bo‘linmalarida keng nishonlanmoqda. Tantanali tadbirlarda kombinat xotin-qizlarining mehnati, korxona rivojiga qo‘shayotgan hissasi eʼtirof etilib, soha ilg‘orlari munosib rag‘batlantirilmoqda.

7-mart kuni Navoiy shahridagi “Farhod” madaniyat saroyida “Navoiy kon-metallurgiya kombinati” aksiyadorlik jamiyati, “NKMK jamg‘armasi” davlat muassasasi, Navoiy davlat konchilik va texnologiyalar universitetida faoliyat olib borayotgan xotin-qizlar uchun bahor ayyomiga bag‘ishlangan bayram tadbiri bo‘lib o‘tdi. Tantanada “NKMK” AJ Boshqaruv raisi – Bosh direktori Q.Sanaqulov korxonalar xotin-qizlarini bayram munosabati bilan samimiy tabrikladi.

Tabrikda kombinatda bugungi kunda 6 ming nafardan ortiq xotin-qizlar, ular orasida 40 nafar davlatimizning yuksak mukofotlari sovrindorlari kombinat ravnaqi yo‘lida astoydil xizmat qilib kelayotgani mamnuniyat bilan taʼkidlandi. Shuningdek, bu yilgi bayramda Janubiy kon boshqarmasi “Zarmitan” koni laboranti Maqsuda Qudratova “Moʻtabar ayol” ko‘krak nishoniga sazovor bo‘ldi.

Tadbirda bir guruh soha ilg‘orlari “NKMK faxriysi” unvoni bilan taqdirlandilar.

“Farhod” madaniyati saroyi badiiy jamoalari va xonandalari tomonidan tuhfa etilgan musiqiy dastur tadbir ishtirokchilariga bayramona kayfiyat ulashdi.

“NKMK” AJ matbuot xizmati.