Navoiy kon-metallurgiya kombinatida oltin tarkibli maʼdanlarni konlardan gidrometallurgiya zavodlariga qayta ishlash uchun yetkazish og‘ir yuk ko‘taruvchi avtoag‘dargichlar yordamida bajarilmoqda.

Keyingi yillarda amalga oshirilgan investitsion loyihalar doirasida kombinat transport parki zamonaviy, eng so‘nggi rusumdagi avtoag‘dargichlar hisobiga oshdi.

Misol uchun, “Muruntov” konida 2023-yilgacha 117 ta 136 tonnadan 221 tonnagacha yuk ko‘tarish quvvatiga ega “Komatsu”, “Caterpillar”, “BelAZ” rusumli avtoag‘dargichlardan foydalanilgan bo‘lsa, 2024-yilda texnikalar soni 136 taga yetdi. Ushbu kon texnikalarining bir martalik yuk tashish hajmi qariyb 27 ming tonnani tashkil etib, o‘tgan yilning shu davriga nisbatan 18,8 foizga oshdi.

Konchilik ishlarini amalga oshirishda yuqori ish unumdorligini taʼminlash maqsadida, yaqinda “Muruntov” konida muhim yangilik ro‘y berdi. Xususan, konda yuk ko‘tarish quvvati 254 tonna bo‘lgan “Komatsu 860E-1K” rusumli 4 ta avtoag‘dargich ish boshladi. Mazkur avtoag‘dargichlar Markaziy Osiyoda foydalanishga topshirilgan shu rusumdagi ilk konchilik texnikalaridir. Joriy yil yakuniga qadar yana 6 ta mazkur avtoag‘dargich olib kelinishi rejalashtirilgan.

– Bunday yangi avtoag‘dargichda issiq, sovuq ob-havo sharoitada ishlash uchun haydovchiga barcha qulayliklar yaratilgan. Ish jarayonida xavfsizlikni taʼminlash uchun uning yon va orqa qismlariga qo‘shimcha videokuzatuv kameralari o‘rnatilgan. Uning yana bir o‘ziga xosligi agar avtoag‘dargichda nosozliklar paydo bo‘lsa, ular avtomatik ravishda aniqlanadi va maxsus ekranda namoyon bo‘ladi, – dedi “NKMK” AJ Markaziy kon boshqarmasi Avtomobil transporti boshqarmasi haydovchisi Tohir Toshanov.

Ushbu zamonaviy kon texnikasining ish unumdorligi konda mavjud avtoag‘dargichlarga nisbatan 15 foizga ortiq bo‘lib, 5 foizgacha yonilg‘ini tejash, sarf-xarajatlarni qisqartirish imkonini beradi.

“NKMK” AJ Matbuot xizmati.