Bugungi kunda “Navoiy kon-metallurgiya kombinati” AJning axborot-kommunikatsiya texnologiyalari sohasi tizimida Axborot-kommunikatsiya texnologiyalari boshqarmasi, uning 4 ta yirik bo‘linmalardagi markazlari va boshqa bo‘limlari faoliyat olib bormoqda. Ularda 400 nafardan ortiq soha xodimlari faoliyat olib bormoqda.

Kombinatning axborot va telekommunikatsiya infratuzilmasi modernizatsiyalash maqsadida 3,1 mingtadan ortiq zamonaviy kompyuter uskunalari xarid qilindi va tezkor maʼlumotlarni uzatish tarmoqlari qurildi. Onlayn uchrashuvlarni o‘tkazish uchun NKMK rahbariyati va bosh mutaxassislari xizmat xonalari veb-kameralar bilan jihozlanib, videokonferensaloqa tizimiga ulandi.

So‘nggi yillarda Axborot-kommunikatsiya texnologiyalari boshqarmasi mutaxassislari tomonidan 200 ga yaqin ishlab chiqarish va boshqaruv vazifalarini bajaradigan 20 dan ortiq axborot tizimlari ishlab chiqildi. Shuningdek, ishlab chiqarish va boshqaruv jarayonlarining uzluksizligi va barqarorligini taʼminlash uchun IP telefon aloqasini kengaytirish, maʼlumotlarni uzatish tarmoqlarini tashkil qilish, kompyuter va tarmoq infratuzilmasini qurish, axborot tizimlarini joriy etish bo‘yicha amaliy ishlar amalga oshirildi.

Xususan, AKTBning Navoiy axborot-kommunikatsiya texnologiyalari markazi tomonidan 11 mingga yaqin abonentlarga telefon aloqasi xizmati ko‘rsatilib kelinmoqda. Mutaxassislar tomonidan 100 kilometrga yaqin shisha tolali aloqa kabellari yotqizilib, kombinat maʼlumot uzatish tarmog‘ining o‘tkazuvchanlik quvvati 2 Mbit/sekunddan 1 Gbit/sekundgacha oshirildi. Server qurilmalarining o‘tkazuvchanlik tezligi 10 Gbit/sekundgacha yetkazildi. Markazning servis xizmat ko‘rsatish bo‘limi xodimlari tomonidan 2023-yilda kombinatning Navoiy maydonidagi bo‘linmalariga jami 10 mingdan ortiq IT xizmatlar ko‘rsatildi. Joriy yilda maʼlumotlarni qayta ishlash markazini yaratish, telekommunikatsiya tizimlarini modernizatsiya qilish, zamonaviy idoraviy aloqani joriy qilish kabi bir nechta loyihalarni amalga oshirish rejalashtirilgan.

70520242

O‘zbekiston Respublikasi Prezidentining 2023-yil 24-maydagi “Maʼmuriy islohotlar doirasida raqamli texnologiyalar sohasida davlat boshqaruvini samarali tashkil etish chora-tadbirlari to‘g‘risida”gi Farmoniga muvofiq, mamlakatimizda 7-may – Axborot-kommunikatsiya texnologiyalari sohasi xodimlari kuni sifatida nishonlanmoqda.

Sana munosabati bilan Axborot-kommunikatsiya texnologiyalari boshqarmasi mutaxassislarining mehnati eʼtirof etilib, bir guruh xodimlarga “Konchilik shuhrati” ko‘krak nishoni va faxriy yorliklar topshirildi.

Kombinatda faoliyat olib borayotgan soha xodimlarini samimiy tabriklaymiz, masʼuliyatli ishlarida ulkan zafarlar tilaymiz!

“NKMK” AJ Matbuot xizmati.