Navoiy kon-metallurgiya kombinati ishchi-xodimlarining mehnat muhofazasi va xavfsizlik texnikasi talablariga rioya qilishdagi masʼuliyatini oshirish, bo‘linma va korxonalar jamoalarida mehnat muhofazasi muhitini yaxshilash hamda ishlab chiqarishda yuzaga kelishi mumkin bo‘lgan baxtsiz hodisalarning oldini olish maqsadida tizimli ishlar olib borilmoqda.

Xususan, Shimoliy kon boshqarmasining “Sharqiy” konida ish vaqtida ishchi-xodimlar uchun mehnat sharoitlari va xavfsizligini yaxshilashga alohida eʼtibor qaratilmoqda. Konda qazish ishlari jarayonida atmosferaga ko‘tarilayotgan changlarni kamaytirish uchun yo‘llarga doimiy ravishda suv sepiladi, quduqlarni burg‘ilash chang bostirish yo‘li bilan amalga oshiriladi. Ishchi-xodimlarning mehnat muhofazasi madaniyatini oshirish maqsadida konda doimiy ravishda ko‘rgazmali materiallar va videoroliklar qo‘llanilgan holda uchrashuvlar tashkil etilib, har bir ishchi-xodimning bilimlari sinovdan o‘tkazilib kelinmoqda.

Ish jarayonida mehnat muhofazasi va xavfsizlik texnikasi talablariga rioya qilishda yuqori natijaga erishgan hamda belgilangan ishlab chiqarish rejalarini to‘liq bajargan mehnat jamoalaridan biri bu “Sharqiy” koni 2-burg‘ilash ishlari uchastkasi “Epiroc” rusumli burg‘ilash uskunasi brigadasidir.

50620242

Ushbu brigadaning har bir vakili mehnat muhofazasi bo‘yicha o‘z bilim va ko‘nikmalarini muntazam ravishda oshirib borishmoqda. Bu esa o‘z navbatida ular tomonidan mehnat muhofazasi va xavfsizlik texnikasi qoida va talablariga to‘liq rioya etib kelayotganliklari yuqori natijalarga erishishga xizmat qilmoqda.

“NKMK” AJ Matbuot xizmati.