“O‘zbekiston – 2030” strategiyasini “Atrof-muhitni asrash va “yashil iqtisodiyot” yili”da amalga oshirishga oid Davlat dasturida “Navoiy kon-metallurgiya kombinati” AJ tomonidan bajarilishi lozim bo‘lgan 4 ta band o‘rin olgan. Mazkur bandlar ijrosini taʼminlash maqsadida 2025-yilning 1-choragida kombinatda quyidagi ishlar bajarildi.

Xususan, Davlat dasturining 4-ilovasi 6-bandiga muvofiq, “Mahalliylashtirish va import o‘rnini bosuvchi mahsulotlar turlarini ko‘paytirish” yo‘nalishida kombinatda joriy yilning yanvar-mart oylarida 349,8 mlrd. so‘mlik mahalliylashtirilgan mahsulotlar ishlab chiqarilib, o‘tgan yilning mos davriga nisbatan o‘sish surʼati 148,2 foizni tashkil etdi.

Shuningdek, Davlat dasturining 4-ilovasi 8-bandiga muvofiq, “Yirik korxonalar tomonidan ESG hisobotlarini yuritish amaliyotini yo‘lga qo‘yish va jamoatchilikka oshkor etish” yo‘nalishida xalqaro konsalting kompaniyasi xizmatlarini jalb etish uchun texnik topshiriq tayyorlanib, hozirda tegishli hujjatlar kelishilmoqda. “NKMK” AJning 2024-yildagi Barqaror rivojlanish (ESG) bo‘yicha hisoboti 1-iyulga qadar tayyorlanib, kombinat rasmiy saytida joylashtirilishi rejalashtirilgan.

Shu bilan birga, Davlat dasturining 4-ilovasi 12-bandiga muvofiq, “Muruntov” konini o‘zlashtirish investitsiya loyihasining navbatdagi bosqichlarini amalga oshirish” yo‘nalishida shu yilning 1-choragida kombinat tomonidan mazkur loyihaning texnik-iqtisodiy asosi ishlab chiqilib, O‘zbekiston Respublikasi Tog‘-kon sanoati va geologiya vazirligi Kon-metallurgiya va investitsiya loyihalari qo‘shma ilmiy-texnik Kengashiga ko‘rib chiqish va kelishish uchun kiritildi.

Bundan tashqari, Davlat dasturining 16-ilovasi 28-bandiga muvofiq, “Atrof-muhitni muhofaza qilish va issiqxona gazlari tashlanmalarini kamaytirishga qaratilgan strategiyani amalga oshirish” yo‘nalishida 2025-yilning 1-choragida atmosfera havosini ifloslantirish manbalaridan namunalar olish va tahlil qilish bo‘yicha 2 ta avtomatik stansiya hamda chang-gaz tozalash uskunalarini o‘rnatish va eskilarni almashtirish bo‘yicha chora-tadbirlar rejasi tasdiqlandi. Avtomatik stansiyalarni xarid qilish uchun Davlat ekologik sertifikatlashtirish va standartlashtirish markazi bilan texnik topshiriq ishlab chiqish uchun shartnoma imzolandi. Iqlim strategiyasini ishlab chiqish bo‘yicha xorijiy kompaniyalar bilan hamkorlikda ishlar olib borilmoqda.

Bir so‘z bilan aytganda, Navoiy kon-metallurgiya kombinati tomonidan “Atrof-muhitni asrash va “yashil iqtisodiyot” yili”da belgilangan vazifalar ijrosini o‘z vaqtida taʼminlash bo‘yicha ishlar davom ettirilmoqda.

“NKMK” AJ Matbuot xizmati