So‘nggi to‘rt yil mamlakatimiz tarixida tub islohotlar va yangilanish davri bo‘ldi. Ayniqsa, mamlakatimiz iqtisodiyotini rivojlantirish, zamonaviy texnologiyalar asosida sanoatni taraqqiyot ettirishga alohida eʼtibor qaratildi. Ushbu islohotlarning mazmun-mohiyati va ahamiyatini xalqimizga yetkazish maqsadida o‘tkazilayotgan “Yangi O‘zbekiston – yangicha dunyoqarash” maʼnaviy-maʼrifiy tadbirlarida olimlar, yozuvchi-shoirlar, madaniyat arboblari, teatr aktyorlari va iqtidorli yoshlardan iborat targ‘ibotchilar guruhlari tomonidan bildirilgan fikrlar va namoyish etilgan sahna ko‘rinishlari, shuningdek, Vatanni madh etuvchi kuy-qo‘shiqlar tadbir qatnashchilariga ko‘tarinki kayfiyat bag‘ishlamoqda.

25noyabr

Navoiy kon-metallurgiya kombinati ishchi-xodimlari uchun maʼnaviy-maʼrifiy tadbirlar o‘tkazilmoqda. Xususan, 24 noyabr kuni Navoiy shahridagi “Farhod” madaniyat saroyida tashkil etilgan tadbirda olimlar, elimiz eʼtiboridagi sanʼatkorlar qatnashdilar.

O‘zbekiston davlat drama teatri aktyori Bahodir Nurmahsumov, Muqimiy nomidagi musiqali drama teatri ijodkori Baxtiyor Musayevlar sahnalashtirilgan spektakllardan parchalar, “Farhod” madaniyat saroyining xonandalari – “Nihol” mukofoti sovrindori Sherzod Davronov, “Shuhrat” medali sohibi Serijan Janaxmetov, Muslima Nurinbetova, Bunyod Hasanov, Samandar Hamidov, Mahbuba Mardonovalar hamda raqs jamoalari qiziqarli konsert dasturini namoyish etdilar. Navoiy davlat konchilik instituti dotsenti Dilfuza Ismoilova yurtimizda olib borilayotgan islohotlarning mazmun-mohiyatini tushuntirdi, videoroliklar namoyish etildi.

Kombinatning bo‘linmalari joylashgan barcha shahar va qo‘rg‘onlarda “Yangi O‘zbekiston – yangicha dunyoqarash” shiori ostidagi maʼnaviy-maʼrifiy tadbirlar tashkil etildi.

NKMK Matbuot markazi.