1-mart kuni “NKMK” AJ boshqarmasida Navoiy kon-metallurgiya kombinati yosh ishchi-xodimlari o‘rtasida 2024-yilda o‘tkazilgan “Eng yaxshi ratsionalizatorlik taklifi” tanlovi g‘oliblarini taqdirlash tadbiri o‘tkazildi.

Tadbirda “NKMK” AJ Boshqaruvi raisi – Bosh direktori Q.Sanaqulov ishtirok etib, tanlov g‘oliblarini tabrikladi va kombinatda ishlab chiqarish jarayoniga ilmiy ishlanmalar, innovatsion g‘oya va ratsionalizatorlik takliflarini joriy etishga katta eʼtibor berilayotganini alohida taʼkidladi. So‘nggi yillarda korxona mutaxassislari tomonidan 37 ta yaratilgan ixtiroga respublika va xorijiy davlatlarning patentlari olindi. 2018-2024-yillarda 1 253 ta ratsionalizatorlik taklifidan kombinat 556,2 mlrd. so‘m iqtisodiy samaradorlikka erishdi. Tanlov shartlariga ko‘ra, ularning mualliflari 6,9 mlrd. so‘m mablag‘ bilan rag‘batlantirildi.

“Eng yaxshi ratsionalizatorlik taklifi” tanlovi komissiyasiga 271 nafar ishtirokchidan 276 ta ratsionalizatorlik taklifi kelib tushdi. Tanlov komissiyasi tomonidan ular orasidan 9 ta yo‘nalish bo‘yicha eng munosib topilgan g‘oliblar aniqlandi.

Jumladan, quyidagilar faxrli 1-o‘rinni qo‘lga kiritgan eng yaxshi ratsionalizatorlik takliflari sohiblari, deb topildi:

– “Geologiya” yo‘nalishi bo‘yicha Markaziy kon boshqarmasi “Muruntov” koni Gamma-aktivlashtirilgan tahlil markaziy laboratoriyasi boshlig‘i Alisher Qo‘ldoshev;

– “Konchilik ishi” yo‘nalishi bo‘yicha Markaziy kon boshqarmasi “Muruntov” koni “Bessopantov-Chuqurquduq” karyeri bosh muhandisi Shodlikjon Xudoyberdiyev;

– “Oltin ajratib olish texnologiyasi” yo‘nalishi bo‘yicha Markaziy kon boshqarmasi 7-gidrometallurgiya zavodi bosh muhandisining ishlab chiqarish bo‘yicha o‘rinbosari Olimjon Ahatov va “Oltinni uyumda eritmaga o‘tkazish sexi” koni bosh muhandisi Sardor Polvonov;

– “Mexanika” yo‘nalishi bo‘yicha “Qizilqum” kon boshqarmasi konstruktorlik byurosi muhandis-konstruktori Sanʼatjon Neʼmatov;

– “Energetika” yo‘nalishi bo‘yicha Ishlab chiqarishni avtomatlashtirish boshqarmasi Avtomatlashtirish bo‘yicha nostandart vositalarni tayyorlash laboratoriyasi boshlig‘i Sardor Norboyev;

– “Transport” yo‘nalishi bo‘yicha “Qizilqum” kon boshqarmasi “Qoraqo‘ton” koni ustasi Mirolim Urchinov;

– “Ishlab chiqarishni avtomatlashtirish” yo‘nalishi bo‘yicha Ishlab chiqarishni avtomatlashtirish boshqarmasi Avtomatlashtirish bo‘yicha nostandart vositalarni tayyorlash laboratoriyasi boshlig‘i Sardor Norboyev;

– “Axborot-kommunikatsiya texnologiyalar” yo‘nalishi bo‘yicha AKTB “Qizilqum” axborot texnologiyalar bo‘limi guruh muhandis-tizim maʼmuri Sayfullaxon Xojiyev.

– “Xavfsizlik texnikasi” yo‘nalishi bo‘yicha Ishlab chiqarishni avtomatlashtirish boshqarmasi Avtomatlashtirish bo‘yicha nostandart vositalarni tayyorlash laboratoriyasi boshlig‘i Sardor Norboyev.

Shuningdek, yana 20 nafar ishtirkchi ratsionalizatorlik takliflari bo‘yicha 2- va 3-o‘rinlarga loyiq, deb topildi.

Tanlov g‘oliblari diplom va pul mukofotlari bilan taqdirlandi.

“NKMK” AJ Matbuot xizmati.