“O‘zbekiston – 2030” strategiyasini “Atrof-muhitni asrash va “yashil iqtisodiyot” yili”da amalga oshirishga oid Davlat dasturida tabiiy resurslarni tejash va ulardan oqilona foydalanish, respublika energobalansida qayta tiklanuvchi energiya ulushini oshirish, shu jumladan, aholi xonadonlarida quyosh panellarini o‘rnatishni rag‘batlantirish kabi mamlakatimiz rivojlanishining ustuvor yondashuvlari belgilandi.

Ushbu vazifalar ijrosini taʼminlash maqsadida, “NKMK” AJ Markaziy kon boshqarmasida ishchi-xodimlar uchun “Aholi xonadonlarida quyosh panellarini o‘rnatishni rag‘batlantirish” mavzusida targ‘ibot tadbiri tashkil etildi.

Tadbirda Zarafshon shahar hokimligi, huquqni muhofaza qiluvchi organlar, hududiy elektr tarmoqlari va gaz taʼminoti korxonalari va bank vakillati ishtirok etishdi. Ular tomonidan quyosh panellari va suv isitish qurilmalaridan foydalanish afzalliklari, bu panellar orqali elektr energiya ishlab chiqarilganda atrof-muhitga hech qanday zararli gazlar chiqmasligi to‘g‘risida aytib o‘tildi.

Shuningdek, bunday qurilmalar binolarning tom qismida hamda bo‘sh yer maydonlarga o‘rnatilgani uchun ishlash jarayonida hech qanday shovqin bo‘lmasligi, ularni o‘rnatish oson ekanligi va uzoq yillar texnik xizmat ko‘rsatish talab etilmasligi hamda xonadon egasi ehtiyojidan ortgan qismini elektr tarmoqlari korxonasiga sotib, daromad olish ham mumkinligi va bunda jismoniy shaxslar tomonidan soliq to‘lovlari amalga oshirilmasligi taʼkidlandi.

Tadbir so‘ngida quyosh panellari va suv isitish qurilmalarining afzalliklari to‘g‘risida videorolik namoyish etildi.

“NKMK” AJ Matbuot xizmati.