IJTIMOIY MASʼULIYAT

Navoiy kon-metallurgiya kombinati tomonidan joylarda ijtimoiy himoyaga muhtoj oilalarni moddiy va maʼnaviy qo‘llab-quvvatlash, kambag‘al oilalarning ishsiz aʼzolari bandligini taʼminlash, ularni doimiy daromad manbaiga ega bo‘lishlariga ko‘maklashish borasida bir qator ijobiy ishlar amalga oshirilmoqda.

O‘zbekiston Respublikasi Prezidentining 2025-yil 6-martdagi “Mahallalarda tomorqalardan samarali foydalanishni tashkil etish orqali aholi bandligi va daromadlarini oshirishga qaratilgan ishlarni yanada jadallashtirish to‘g‘risida”gi farmoyishi hamda “Kambag‘allikdan farovonlik sari” dasturida belgilangan vazifalar ijrosi taʼminlanmoqda.

Xususan, kombinat homiyligida Tomdi tumanidagi “Ayaqquduq” ovul fuqarolar yig‘ini va Uchquduq tumanidagi “Yo‘lchilar” ovul fuqarolar yig‘inida istiqomat qiluvchi 10 ta ijtimoiy himoyaga muhtoj oilaning uy-joylari kuz-qish mavsumiga mos holda to‘liq taʼmirlanib, xonadonlar o‘z egalariga topshirildi.

– Qizilqum sahrosida yashash insondan katta matonat talab qiladi. To‘g‘risi qo‘limiz kaltalik qilib, cho‘l sharoitida uyimizni taʼmirlash imkonsiz edi. Yurtimizda “Kambag‘allikdan – farovonlik sari!” harakati boshlandi, bu – biz kam taʼminlangan oilalarga imkoniyat berdi. Navoiy kon-metallurgiya kombinati homiyligida bugun yangi ko‘rinishga kelgan xonadonimga ko‘chib o‘tdim. Keng va shinam xonalarni ko‘rgan farzandlarim quvonchiga sherik bo‘lib turibman, – deydi Tomdi tumanidagi “Ayaqquduq” OFYda yashovchi Jangeldi O‘zbekov.

Taʼkidlash joizki, kombinat rahbariyati saʼy-harakati bilan shu kunga qadar Nurota, G‘ozg‘on, Uchquduq va Tomdi tuman va shaharlarida istiqomat qilib kelayotgan xonadonlar yirik va mayda shoxli mollar hamda boshqa daromad manbai bilan taʼminlandi.

“NKMK” AJ Matbuot xizmati