Oldin xabar berganimizdek, Kanadaning Toronto shahrida tog‘-kon sanoati, shu jumladan foydali qazilmalarni qidirish va qazib olish bo‘yicha dunyodagi eng yirik tadbir – “PDAC 2025: The World‘s Premier Mineral Exploration & Mining Convention” ko‘rgazma-anjumani o‘tkazildi. Mazkur tadbirda “Navoiy kon-metallurgiya kombinati” AJ delegatsiyasi ketma-ket uchinchi marotaba ishtirok etdi.

Joriy yilda ko‘rgazma-anjuman doirasida o‘tkazilgan tarmoq tadbirlari va uchrashuvlarda dunyoning 135 dan ortiq mamlakatidan 27 ming nafardan ziyod ishtirokchi qatnashdi.

Mazkur ko‘rgazma-anjumanda “NKMK” AJ delegatsiyasi kombinatda amalga oshirilayotgan keng ko‘lamli ishlar va erishilgan natijalarni taqdim etib, xorijiy kompaniya vakillari bilan yangi aloqalarni o‘rnatdi. Shuningdek, Mo‘g‘uliston Geologiya vazirligi vakillari, Qozog‘iston tog‘-kon sanoati ishlab chiqaruvchilari, potensial investorlar va Toronto fond birjasi vakillari bilan uchrashuvlar o‘tkazildi. Bundan tashqari, kombinat vakili “International Women in Mining” (“IWiM” – tog‘-kon sanoatidagi Xalqaro ayollar tashkiloti) bilan hamkorlikda gender tenglik va sohada xotin-qizlarni rag‘batlantirish bo‘yicha davra suhbatida ishtirok etdi.

Tadbir doirasida “Investorlar uchun korporativ taqdimot forumi” sessiyasi bo‘lib o‘tdi. Unda ilk bor bosh direktorning transformatsiya masalalari bo‘yicha birinchi o‘rinbosari Yevgeniy Antonov kompaniya faoliyati, rivojlanish istiqbollari va xalqaro oltin qazib olishdagi ahamiyati haqida maʼlumot berdi.

“PDAC” ko‘rgazma-anjumanida ishtirok etish kombinatni O‘zbekiston iqtisodiyotida yetakchi korxona hamda dunyodagi eng yirik va iqtisodiy jihatdan samarali oltin ishlab chiqaruvchilardan biri sifatida namoyon etishga xizmat qiladi.

“NKMK” AJ Matbuot xizmati.