Keyingi yillarda Nurota tumani hududida Navoiy kon-metallurgiya kombinatining “Pistali” koni va uning negizida barpo etilgan 6-gidrometallurgiya zavodi samarali ishlab kelmoqda.

“Pistali” maydonida 2023-yilning yoz faslida ishga tushirilgan va ma’danni qayta ishlash yillak quvvati 5 mln. tonnadan ortiq bo‘lgan 6-gidrometallurgiya zavodida ayni paytda qariyb 800 nafar ishchi va muhandis-texnik xodimlar faoliyat ko‘rsatishyapti. Korxonada barcha ishlab chiqarish jarayonlari avtomatlashtirilgan bo‘lib, texnologik jarayonlar nafaqat dispetcherlik punktidan, balki kuzatuv kameralari hamda “ASODU” tizimi orqali ham nazorat qilinadi. Zavod 90 foiz mahalliylashtirilgan asbob-uskunalar bilan jihozlantirilgan.

Zavod jamoasi joriy yilning ikki oylik rejasini barcha ko‘rsatkichlar bo‘yicha oshirib bajardi. O‘tgan davrda ma’danni qayta ishlash 101,8 foizga, yarim tayyor mahsulot ishlab chiqarish 132,8 foizga uddalandi. Zavod ishga tushirilgan 2023-yilda 2 mln. tonnadan ortiq ma’dan qayta ishlangan bo‘lsa, o‘tgan yili bu ko‘rsatkich 5 mln. tonnadan ortiqni tashkil etdi.

“Pistali” koni tarkibidagi ma’dan tahlil laboratoriyasi, geologiya xizmati mutaxassislari, shuningdek, marksheyderlar, mexaniklar zimmalaridagi vazifalarga mas’uliyat bilan yondashmoqdalar. “Pistali” va “G‘arbiy Pistali” uchastkalaridan kuniga 43,5 ming kubometrdan ortiq kon massasi qazib chiqarilmoqda. Mavjud 7 ta ekskavator, 5 ta burg‘ilash qurilmasidan samarali foydalanilyapti. Yaqin kelgusida “Oltin diyor” uchastkasida ma’danlarni qazib olish ishlari boshlanadi. Avtogarajda mavjud yuzdan ortiq og‘ir yuk, ruda tashiydigan avtoag‘dargichlar, avtobuslar, yuklash-tushirish mexanizmlari, yordamchi va maxsus texnika vositalari yordamida “Pistali” koni hamda 6-GMZga transport xizmati ko‘rsatilyapti.

“Pistali” maydoni hududidagi vaxta shaharchasida 500 o‘rinli yotoqxona, oshxona, tibbiyot xonasi, savdo do‘koni, sport zali, mini-futbol maydoni qurilgan. “Pistali” koni, zavod, avtogaraj, yordamchi uchastkalar ishchi-xizmatchilari, xotin-qizlar, texnik xodimlar uchun barpo etilgan korpuslarda barcha qulayliklar yaratilgan.

6-GMZ foydalanishga topshirilishi Nurota tumaniga kon-metallurgiya sanoatining kirib kelishi, konlarning o‘zlashtirilishi, ravon yo‘llarning qurilishi, infratuzilma obyektlarining qad rostlashi, yangi ish o‘rinlarining yaratilishi, tuman ijtimoiy-iqtisodiy rivojlanishiga ijobiy ta’sir ko‘rsatishi bilan ahamiyatlidir.

“NKMK” AJ Matbuot xizmati