Navoiy kon-metallurgiya kombinatida transport sohasini rivojlantirishga alohida eʼtibor qaratilmoqda. So‘nggi yillarda og‘ir yuk tashuvchi avtoag‘dargichlar va konchilik texnikalari tarkibi muntazam yangilanib borilayapti.

Xususan, Markaziy kon boshqarmasining Avtomobil transporti boshqarmasi hamda 7-avtokorxonasida uzoq yillar foydalanilgan texnikalar zamonaviy, yuqori texnik-iqtisodiy ko‘rsatkichlarga ega transport vositalariga bosqichma-bosqich almashtirilmoqda. Yaqinda 7-avtokorxonasiga “Oltinni uyumda eritmaga o‘tkazish sexi” konida foydalanish uchun yuk ko‘tarish quvvati 25 tonna bo‘lgan 4 ta “MAN” rusumli avtoag‘dargich keltirildi. Avtomobil transporti boshqarmasiga keltirilgan 10 ta “LiuGong” rusumli frontal yuklagich “Muruntov”, “Bessopantov” va “Balpantov” konlarida foydalanilmoqda.

MKB direktorining transport bo‘yicha o‘rinbosari Axat Qurbonovning maʼlum qilishicha:

“Mazkur avtoag‘dargichlar zamonaviy bort kompyuterlari bilan jihozlangan bo‘lib, ular ish jarayonida yuzaga kelishi mumkin bo‘lgan nosozliklar haqida tezkor maʼlumot taqdim etadi. Joriy yilda investitsion loyihalar doirasida kon boshqarmasi bo‘linmalariga yuk ko‘tarish quvvati 90 tonnadan 225 tonnagacha bo‘lgan avtoag‘dargichlar, avtogreyder, frontal yuklagich, g‘ildirakli va zanjirli buldozer kabi yo‘l-qurilish mashinalari, ixtisoslashtirilgan transport vositalari olib kelinishi rejalashtirilgan”.

Ishlab chiqarish jarayonida zamonaviy avtoag‘dargichlar va konchilik texnikalaridan foydalanish ish samaradorligini oshirish bilan birga haydovchilarga qulay ish sharoitlarini yaratmoqda.

“NKMK” AJ Matbuot xizmati