Navoiy kon-metallurgiya kombinatida ishchi-xodimlarning malakasini muntazam oshirib borish tizimli yo‘lga qo‘yilgan. Muhim yo‘nalishlardagi o‘quvlar respublika masʼul tashkilotlari bilan hamkorlikda olib borilayotgani o‘zining ijobiy natijasini bermoqda.

O‘zbekiston Respublikasi Texnik jihatdan tartibga solish agentligi, Standartlashtirish, sertifikatlashtirish va texnik jihatdan tartibga solish ilmiy-tadqiqot instituti, sanoat xavfsizligi kursi bo‘yicha “Kontexnazorato‘quv” davlat muassasasi bilan hamkorlikda xodimlarni qayta tayyorlash va malakasini oshirishga qaratilgan o‘quv kurslari tashkil etilmoqda.

Jumladan, shu kunlarda “NKMK” AJning o‘quv markazlarida 42 nafar ishchi-xodim standartlashtirish, sertifikatlashtirish va texnik jihatdan tartibga solish o‘quv kursi bo‘yicha malakasini oshirmoqda.

Kombinatning Navoiy shahridagi O‘quv markazi direktori N.Ahatov taʼkidlaganidek:

“Soha mutaxassislari tomonidan olib borilayotgan mashg‘ulotlar qiziqarli kechmoqda. Chunki xodimlar uchun mavzu va uning tartib-tamoyillarini bilish, bilim va ko‘nikmalarini oshirish muhim ahamiyat kasb etadi. Joriy yilning shu davriga qadar kombinat o‘quv markazlarida kurs va yo‘nalishlar bo‘yicha 495 nafar rahbar, muhandis-texnik xodim o‘qitildi, 1 731 nafar ishchi-xodim kasbga qayta o‘qitildi, 6 055 nafarining esa malakasi oshirildi. Shuningdek, 2 372 nafar xodim ikkinchi turdosh kasbga o‘qitilishi amalga oshirildi. Kelgusi yilda ham bu kabi ishlar davom etadi.”

“NKMK” AJ Matbuot xizmati.