“NKMK” AJ boshqarmasida kombinat rahbariyati, mutaxassislari hamda “Boston Consulting Group” (BCG) kompaniyasining xalqaro ekspertlari ishtirokida zamonaviy kon-metallurgiya kompaniyasining investitsion jarayonlariga bag‘ishlangan navbatdagi seminar o‘tkazildi.

Seminar kun tartibida investitsiya qarorlarini qabul qilish bo‘yicha ilg‘or jahon tajribalari, investitsion loyihalarni ko‘p bosqichli amalga oshirishda vakolatlarni taqsimlash hamda ularni amalga oshirish jarayonlariniini rivojlantirish yo‘nalishlarini aniqlash kabi masalalar muhokama etildi.

Tadbirda kombinat tomonidan investitsiya jarayonlarini transformatsiya qilish davomida amalga oshirilgan ishlar, jumladan, ko‘p bosqichli loyihalash reglamenti va investitsiya qo‘mitasini joriy etish, qo‘mitaning ishlash tamoyillarini belgilash borasidagi faoliyati alohida taʼkidlandi.

Bugungi kunda “NKMK” AJ konchilik sohasidagi boshqa kompaniyalar singari investitsiya jarayonlariga yuqori talablar qo‘yadigan tashqi omillarga duch kelmoqda, xususan, moliyaviy manbalarning cheklanganligi va banklarning investitsiyalarni asoslashga bo‘lgan talablarining kuchayishi, yangi konlarni ochish surʼatlarining sekinlashuvi hamda qayta ishlash texnologiyalarining murakkablashuvi shular jumlasidandir.

Shu bilan birga, kombinat soha yetakchisi sifatida investitsiya jarayonlarini takomillashtirishning muhimligini anglamoqda, chunki bu kapital mablag‘lar samaradorligini taʼminlaydi va uzoq muddatli rivojlanish yo‘nalishlarini qo‘llab-quvvatlaydi.

“NKMK” AJ Matbuot xizmati.