O‘zbekiston Respublikasi Prezidenti Shavkat Mirziyoyev raisligida joriy yilning 5-mart kuni Korrupsiyaga qarshi kurashish bo‘yicha milliy kengashning korrupsiyaning oldini olish bo‘yicha ishlar natijadorligi va kelgusidagi ustuvor vazifalarga bag‘ishlangan kengaytirilgan yig‘ilishida belgilangan vazifalar ijrosi bo‘yicha Navoiy kon-metallurgiya kombinatida tizimli ishlar amalga oshirilmoqda.

Xususan, “NKMK” AJ Komplayens xizmati masʼul xodimlari tomonidan “Qizilqum” kon boshqarmasi bo‘linmalarida ishchi-xodimlar uchun “Korrupsiyaga qarshi kurashish siyosati”, “Odob-axloq qoidalari” hamda O‘zbekiston Respublikasining “Manfaatlar to‘qnashuvi to‘g‘risida”gi Qonuni mazmun-mohiyatini tushuntirish bo‘yicha o‘quv seminarlar va davra suhbatlari o‘tkazildi.

Tadbirlarda Komplayens xizmati vakillari ishchi-xodimlarga mavzularga oid tushuntirish ishlarini olib borib, mamlakatimizda korrupsiyaga qarshi kurashish bo‘yicha olib borilayotgan amaliy ishlar va kombinatda xodimlarning Odob-axloq kodeksiga amal qilishi to‘g‘risida fikr-mulohazalarni bildirishdi.

Bu kabi targ‘ibot tadbirlari kombinat ishchi-xodimlarini korrupsiya va uning salbiy oqibatlari haqida xabardor etib, ogohlik, odob-axloq qoidalariga amal qilishga chorlaydi.

“NKMK” AJ Mutbuot xizmati.