Navoiy kon-metallurgiya kombinatida inson hayoti, sog‘ligi bilan bog‘liq bo‘lgan mehnat muhofazasi va xavfsizlik texnikasini taʼminlash masalasiga katta eʼtibor qaratilib kelinmoqda. Ishlab chiqarish jarayonlarida yuzaga kelishi mumkin bo‘lgan baxtsiz hodisalar va kasbiy kasalliklarning oldini olish maqsadida kombinat bo‘linmalaridagi ish jarayonida mehnat muhofazasi va xavfsizlik texnikasining talablarini bajarilishi nazorat qilib borilmoqda.

“NKMK” AJ boshqarmasida kombinat rahbariyati, Mehnat muhofazasi va xavfsizlik texnikasi bosh boshqarmasi, NKMK xodimlari kasaba uyushmasi Kengashi vakillari, bo‘linmalar rahbar-xodimlari ishtirokida videokonferensaloqa orqali yig‘ilish o‘tkazildi. Mazkur yig‘ilishda 2024-yilda hamda 2025-yilning 1-choragida kombinat tizimidagi korxonalarda mehnatning xavfsiz sharoitlarining taʼminlanganligi, yaratilgan shart-sharoitlar, aniqlangan kamchiliklarni bartaraf etish yo‘llari tahliliy-tanqidiy tarzda muhokama etildi.

– Kombinat ishchi-xodimlarining sog‘ligi va mehnat jarayonidagi xavfsizligini taʼminlash asosiy vazifamizdir. Bu borada bo‘linmalarida ishlab chiqarish faoliyati mehnat muhofazasi va sanoat xavfsizligi talablariga rioya etgan holda olib borish doimiy monitoring qilib borilmoqda. Shuningdek, korxonamiz ishchi-xodimlarida xavfsizlik madaniyatini oshirish bo‘yicha tizimli ishlar amalga oshirilmoqda, – deydi “NKMK” AJ Mehnat muhofazasi va xavfsizlik texnikasi bosh boshqarmasi boshlig‘i o‘rinbosari Xamza Rajabov.

Yig‘ilishda mehnat muhofazasi qoidalari talablarining buzilish holatlari muhokama etilib, ularni oldini olish yuzasidan tavsiyalar berildi. Shuningdek, mehnat muhofazasiga bog‘liq boshqa bir qator masalalar ham ko‘rib chiqildi. Yakunda qo‘shma qaror qabul qilindi.

“NKMK” AJ Matbuot xizmati