Navoiy kon-metallurgiya kombinati korxonalarida ishchi-xodimlarning mehnat muhofazasi va xavfsizlik texnikasiga oid bilimlarini doimiy ravishda oshirish muhim ahamiyat kasb etadi. Xususan, Markaziy kon boshqarmasida joriy yilning aprel oyi “Mehnat muhofazasi va xavfsizlik texnikasi oyligi”, deb eʼlon qilindi.

Mazkur oylik doirasida Zarafshon shahridagi “Oltin vodiy” maʼdaniyat uyida “NKMK” AJ Mehnat muhofazasi va xavfsizlik texnikasi bosh boshqarmasi vakillari tomonidan kon boshqarmasi ishchi-xodimlari uchun seminar-trening o‘tkazildi.

Seminar-treningda mehnat jarayonida inson hayoti va sog‘lig‘i xavfsizligi taʼminlash, ishchi-xodimlarning mehnat sharoitlarini yaxshilash, ularning huquqlarini himoya qilish, ish joylarida xavfsizlikni taʼminlashga qaratilgan meʼyoriy-texnik hujjatlarning mazmun-mohiyati to‘g‘risida maʼlumot berildi. Shuningdek, tadbir ishtirokchilariga mavzuga oid videoroliklar, slaydlar namoyish etildi.

Tashkil etilgan tadbirdan asosiy maqsad ishchi-xodimlar o‘rtasida mehnat muhofazasi va xavfsizlik texnikasi qoidalariga qatʼiy amal qilish zarurligini targ‘ib etish, ishlab chiqarishda yuzaga kelishi mumkin bo‘lgan baxtsiz hodisalar oldini olishga qaratilgan.

“NKMK” AJ Matbuot xizmati