Navoiy kon-metallurgiya kombinatida bugungi kunda 12,5 ming nafardan ziyod yoshlar mehnat qilmoqda. Ular ishlab chiqarish jarayonlarida faol ishtirok etib kelmoqda. Quvonarli jihati, kombinat yoshlari va boshlang‘ich tashkilot yetakchilari har doim hamjihat va tashabbuskor. Anʼanaga ko‘ra, fidoiy yoshlar joriy yilni ham ezgu tashabbus bilan boshlashdi.

Oltmish nafardan iborat boshlang‘ich tashkilot yetakchilari bugun erta tongdan Jizzax viloyati sari yo‘l olishdi. Ular ayni paytda qadimiy va navqiron Samarqand viloyatiga yetib borib, “O‘zbekiston buylab sayohat qil!” dasturi doirasida Imom al-Buxoriy, Hazrati Xizr, Registon, Islom Karimov uy-muzeyi va boshqa tarixiy majmua hamda obidalarni ziyorat qilishmoqda.

- Mana hozirgina dunyo sayyohlari va jamoatchiligini o‘ziga jalb etib kelayotgan Imom al-Buxoriy majmuasini ziyorat qildik. Bu biz yoshlarga islom dunyosida mashhur bo‘lgan ulug‘ olim va alloma haqida keng taassurotlarga ega bo‘lish bilan birga, barchamizga ilohiy quvvat bag‘ishladi. Ayni paytda zamonaviy va go‘zal Samarqand shahriga kirib keldik. Hududdagi o‘zgarishlar tengdoshlarimizga olam-olam taassurotlar ulashayotganini yuz-ko‘zlaridagi hayrat, quvonchdan ham bilsa bo‘ladi, - deydi Janubiy kon boshqarmasi yoshlar yetakchisi Timur Qalandarov. - O‘ylaymizki, rang-barang dasturlarga boy bu tadbir biz, yoshlar uchun har tomonlama qiziqarli, bir umr yodda qolarli tarzda yuqori saviyada o‘tadi.

Maʼlumot o‘rnida aytish mumkinki, Zomin tumanida joylashgan “NKMK” sihatgohida shu yilning 31-yanvar – 3-fevral kunlari NKMK boshlang‘ich tashkilot yetakchilari uchun liderlik qobiliyatini rivojlantirish, yoshlar bilan ishlash ko‘nikmalarini shakllantirishga qaratilgan o‘quv-amaliy seminarini o‘tkazish rejalashtirilgan. Shu bilan birga, dasturdan qiziqarli maʼnaviy-maʼrifiy va sport tadbirlari ham keng o‘rin olgan.

Dasturdan joy olgan tadbirlar davom etmoqda...

“NKMK” AJ Matbuot xizmati.