O‘zbekiston Respublikasi iqtisodiyoti tarmoqlari salohiyatini ochib berish va mamlakatimizga xorijiy investitsiyalarni jalb etish maqsadida 26-28-mart kunlari London shahrida Iqtisodiyot va moliya vazirligi tomonidan yetakchi investitsiya banklari va konsalting kompaniyalari ishtirokida “Uzbekistan Investor Day” tadbiri o‘tkazilmoqda.

Mazkur tadbirda “Navoiy kon-metallurgiya kombinati” AJ delegatsiyasi ham ishtirok etib, investorlar va moliya institutlari vakillari bilan uchrashuvlar o‘tkazmoqda. Shuningdek, tadbir doirasida bosh direktorning transformatsiya masalalari bo‘yicha birinchi o‘rinbosari Y.Antonov kompaniyaning yutuqlari va kelajakdagi rejalari haqida maʼruza qildi. Yetakchi xalqaro investorlar va kompaniyalar bilan muhokamalar va alohida muzokaralar o‘tkazildi.

Xususan, “NKMK” AJ bilan potensial hamkorlikni rivojlantirish maqsadida Jahon oltin kengashi (World Gold Council) vakillari bilan individual uchrashuv o‘tkazildi. Buyuk Britaniya Biznes va savdo vazirligi tomonidan London fond birjasida O‘zbekiston Respublikasi rasmiy delegatsiyasi uchun ishbilarmonlik qabuli tashkil etilib, unda bir qator moliya institutlari, jumladan “Citibank”, “ICBC Standard”, “JPMorgan”, “Deutsche Bank” va boshqa investitsiya banklari vakillari bilan uchrashuvlar o‘tkazildi.

2024-yilning oktyabr oyida “NKMK” AJ tomonidan London fond birjasida ilk xalqaro korporativ obligatsiyalari muvaffaqiyatli joylashtirildi. Xalqaro moliya institutlari va banklar bilan uchrashuvlar investorlarning kombinatning investitsiya salohiyatiga bo‘lgan yuqori qiziqishini tasdiqladi va korxonaning shaffoflik va xalqaro kompaniyalar bilan o‘zaro hamkorlik strategiyasini mustahkamladi.

“NKMK” AJ Matbuot xizmati