Xorazm viloyati Tuproqqalʼa tumanidagi Sarimoy qishlog‘ida (Amudaryo daryosining o‘ng sohilida) Navoiy kon-metallurgiya kombinatining Bosh suv olish inshoatlar sexi va “Sarimoy maydoni” payvandlash-mexanika uchastkasi joylashgan.

Sex jamoasi Qizilqum sahrosidagi kombinat ishlab chiqarish korxonalariga hamda Zarafshon va Uchquduq shaharlar aholisiga suv yetkazib berish bilan, uchastka jamoasi esa mahalliylashtirilgan mahsulotlar ishlab chiqarish bilan band.

- Sarimoy qishlog‘i olis va chekka aholi manzillaridan biridir. Bu maskanda o‘ndan ortiq millat vakillari yashab kelmoqda. Davlatimiz tomonidan hududni ijtimoiy-iqtisodiy rivojlantirish yo‘lida aholi, yoshlar va xotin-qizlarga ish sharoitlarini yaratib berishga alohida eʼtibor qaratilgan. Bu jarayonda kombinat ham faol qatnashib kelmoqda. Bundan, mahalliy aholi vakillari nihoyatda mamnun. Misol uchun, uchastkamiz 2021-yilda ana shu maqsadda tashkil etilgan. Ish faoliyatini 20 ta ish o‘rni bilan boshlagan mazkur uchastka bugunga kelib ancha kengaydi. Natijada ish o‘rinlari soni 80 taga yetdi. Aholining ishsiz, xorijda migratsiyadan qaytgan yoshlar ishga qabul qilindi, - deydi “Sarimoy maydoni” payvandlash-mexanika uchastkasi boshlig‘i Timur Iskandarov.

O‘tgan yillar mobaynida uchastkada 400 ga yaqin turdagi mahsulot o‘zlashtirilib, nasoslar uchun ehtiyot qismlari va uzellar, vallar, yarimmuftalar, boltlar, gayka va boshqa mahsulotlarni yasash, elektrogazpayvandlash ishlari bo‘yicha har xil hajmdagi konteynerlar, drenaj romlar va payvandlash usuli bilan detallarni taʼmirlash samarali yo‘lga qo‘yildi. 2024-yilda uchastka tomonidan 24 mlrd. so‘mlik mahalliylashtirilgan mahsulotlar ishlab chiqarildi.

Bugungi kelib shu yerda ish boshlaganlar o‘z kasbining mohir egasi sifatida shakllanib, metall kesuvchi, tokar, frezalovchi, parmalovchi va boshqa kasblar bo‘yicha ish yuritib, dastgohlar yordamida ishlab chiqarayotgan mahsulotlari bilan kombinat ishlab chiqarish ko‘rsatkichlariga munosib hissa qo‘shib kelmoqda.

Yaqinda kombinat rahbariyati tashabbusi bilan uchastka negizida elektr-taʼmirlash bo‘linmasi tashkil etilib, 12 ta yangi ish o‘rni yaratildi. Buning uchun sarimoylik ishsiz xotin-qizlar Zarafshon taʼmirlash-mexanika zavodida to‘rt oy davomida kasbga o‘qitildi.

- Onam bizni ham ota, ham ona o‘rnida tarbiyaladi. Oilada ishsiz edim. Shunday kunlarning birida NKMK bo‘linmasida xotin-qizlar uchun yangi ish o‘rinlari yaratilayotganini eshitib, hujjat topshirdim. Mana hozirda doimiy ish o‘ringa ega bo‘ldim. Bundan onam, oilamizning xursandchiligi cheksiz, - deydi uchastka elektr-taʼmirlash bo‘linmasi ishchisi Tovus Mametova.

Kombinat tomonidan bu uchastkani rivojlantirish, kengaytirish, yangi ish o‘rinlari yaratish bo‘yicha ish olib borilmoqda. Bu ham, albatta, sarimoyliklar uchun yana bir imkoniyat bo‘ladi.

“NKMK” AJ Matbuot xizmati